ଇଣ୍ଡିଆନ୍ ପ୍ରିମିୟର ଲିଗ୍ (IPL)ର ୧୯ତମ ସିଜନ୍ ଏବେ ଶେଷ ପର୍ଯ୍ୟାୟକୁ ପହଞ୍ଚିଛି। ଟୁର୍ଣ୍ଣାମେଣ୍ଟ ଆଗକୁ ବଢ଼ିବା ସହିତ ଅରେଞ୍ଜ କ୍ୟାପ୍ ଦୌଡ଼ ମଧ୍ୟ ଅଧିକ ରୋମାଞ୍ଚକର ହୋଇପଡ଼ିଛି। ଡିଫେଣ୍ଡିଂ ଚାମ୍ପିଅନ୍ ରୟାଲ୍ ଚ୍ୟାଲେଞ୍ଜର୍ସ ବେଙ୍ଗାଲୁରୁ ଫାଇନାଲରେ ପହଞ୍ଚିସାରିଥିବା ବେଳେ, ଦ୍ୱିତୀୟ ଫାଇନାଲିଷ୍ଟ କିଏ ହେବ ସେଥିପାଇଁ ମେ’ ୨୯ରେ ଗୁଜରାଟ ଟାଇଟନ୍ସ ଓ ରାଜସ୍ଥାନ ରୟାଲ୍ସ ମଧ୍ୟରେ କ୍ୱାଲିଫାୟର-୨ ଖେଳାଯିବ।
ଏଲିମିନେଟର ମ୍ୟାଚରେ ସନରାଇଜର୍ସ ହାଇଦ୍ରାବାଦ ବିରୋଧରେ ରାଜସ୍ଥାନ ରୟାଲ୍ସର ଯୁବ ବ୍ୟାଟ୍ସମ୍ୟାନ୍ ୱୈଭବ ସୂର୍ୟବଂଶୀ ଐତିହାସିକ ପାଳି ଖେଳି ସମସ୍ତଙ୍କ ନଜର ଆକର୍ଷଣ କରିଛନ୍ତି। ସେ ମାତ୍ର ୨୯ଟି ବଲରେ ୯୭ ରନ୍ କରିଥିବା ବେଳେ ତାଙ୍କ ପାଳିରେ ଥିଲା ୧୨ଟି ବିଶାଳ ଛକା। ଏହି ବିସ୍ଫୋରକ ଇନିଂସ୍ ପରେ ସେ IPL 2026ର ସର୍ବାଧିକ ରନ୍ ସଂଗ୍ରାହକ ହୋଇ ଅରେଞ୍ଜ କ୍ୟାପ୍ ହାସଲ କରିଛନ୍ତି।
ଏହି ସିଜନରେ ୱୈଭବ ୧୫ଟି ଇନିଂସରେ ୬୯୦ ରନ୍ କରିଛନ୍ତି। ତାଙ୍କ ନାମରେ ରହିଛି ଗୋଟିଏ ଶତକ ଓ ୪ଟି ଅର୍ଦ୍ଧଶତକ। ତାଙ୍କ ଆକ୍ରମଣାତ୍ମକ ବ୍ୟାଟିଂ ଏହି ସିଜନରେ ତାଙ୍କୁ ସବୁଠାରୁ ଚର୍ଚ୍ଚିତ ଖେଳାଳିମାନଙ୍କ ମଧ୍ୟରେ ରଖିଛି।
IPL 2026 ଅରେଞ୍ଜ କ୍ୟାପ୍ ଟପ୍-୫
- ୱୈଭବ ସୂର୍ୟବଂଶୀ (RR) – ୬୯୦ ରନ୍
- ସାଇ ସୁଦର୍ଶନ (GT) – ୬୫୨ ରନ୍
- ହେନ୍ରିକ୍ କ୍ଲାସେନ୍ (SRH) – ୬୨୪ ରନ୍
- ଶୁଭମନ୍ ଗିଲ୍ (GT) – ୬୧୮ ରନ୍
- ଇଶାନ କିଶନ୍ (SRH) – ୬୦୨ ରନ୍
ଅନ୍ୟପଟେ ଆରସିବି ତାରକା ବିରାଟ କୋହଲି ଏବେ ଟପ୍-୫ରୁ ଖସି ୬ଠ ସ୍ଥାନକୁ ଚାଲିଯାଇଛନ୍ତି। ସେ ଏହି ସିଜନରେ ୧୫ଟି ଇନିଂସରେ ୬୦୦ ରନ୍ କରିଛନ୍ତି। ତାଙ୍କ ନାମରେ ରହିଛି ଗୋଟିଏ ଶତକ ଓ ୪ଟି ଅର୍ଦ୍ଧଶତକ। ଏହାସହ ସେ ୬୪ଟି ଚୌକା ଓ ୨୨ଟି ଛକା ମାରିଛନ୍ତି।
ତେବେ ବିରାଟ ଏପର୍ଯ୍ୟନ୍ତ ଅରେଞ୍ଜ କ୍ୟାପ୍ ଦୌଡ଼ରୁ ବାହାରିନାହାନ୍ତି। ସେ ୱୈଭବ ସୂର୍ୟବଂଶୀଙ୍କଠାରୁ ୯୦ ରନ୍ ପଛରେ ଅଛନ୍ତି। କ୍ୱାଲିଫାୟର-୨ରେ ସାଇ ସୁଦର୍ଶନ, ଶୁଭମନ୍ ଗିଲ୍ ଓ ୱୈଭବ ଖେଳିବାକୁ ଥିବାରୁ ଅରେଞ୍ଜ କ୍ୟାପ୍ ଦୌଡ଼ ଆହୁରି ରୋମାଞ୍ଚକର ହେବା ନିଶ୍ଚିତ।
