କର୍ଣ୍ଣାଟକର କାରୱାର ଜିଲ୍ଲାରେ ଘଟିଥିବା ଭୟାବହ ନଦୀ ଦୁର୍ଘଟଣାରେ ମୃତକ ସଂଖ୍ୟା ୧୧କୁ ବୃଦ୍ଧି ପାଇଛି। ସୋମବାର ଉଦ୍ଧାରକାରୀ ଦଳ ଶେଷ ନିଖୋଜ ବ୍ୟକ୍ତିଙ୍କ ମୃତଦେହ ତଟାକାଲୁ ନଦୀରୁ ଉଦ୍ଧାର କରିବା ପରେ ଏହି ସଂଖ୍ୟା ସ୍ପଷ୍ଟ ହୋଇଛି। ମୃତକଙ୍କୁ ମହାଦେବ ନାୟକ ବୋଲି ଚିହ୍ନଟ କରାଯାଇଛି।

ସୂଚନାଅନୁସାରେ, ଭଟକଳ ତାଲୁକାର ଶିରାଳୀ ନିକଟସ୍ଥ ପଡୁଶିରାଳୀ ଗ୍ରାମର ଏକେ ପରିବାରର ୧୪ ଜଣ ସଦସ୍ୟ ରବିବାର ତଟାକାଲୁ ନଦୀକୁ ଶଙ୍ଖ ଓ କଞ୍ଚା ମାଛ ସଂଗ୍ରହ ପାଇଁ ଯାଇଥିଲେ। ଏହା କର୍ଣ୍ଣାଟକର ଉପକୂଳ ଅଞ୍ଚଳରେ ପାଣି କମିଯିବା ପରେ ସାଧାରଣତଃ କରାଯାଉଥିବା ଏକ ପାରମ୍ପରିକ କାର୍ଯ୍ୟ। କିନ୍ତୁ ଅସାବଧାନତାବଶତଃ ସେମାନେ ନଦୀର ଗଭୀର ଅଞ୍ଚଳକୁ ପ୍ରବେଶ କରିଥିବାରୁ ଅନେକ ଲୋକ ପାଣିର ସ୍ରୋତରେ ଭାସିଯାଇଥିଲେ।

ରବିବାର ଦିନ ୧୦ ଜଣଙ୍କ ମୃତଦେହ ଉଦ୍ଧାର ହୋଇଥିବା ବେଳେ, ସ୍ଥାନୀୟ ଲୋକମାନେ ତୁରନ୍ତ ୩ ଜଣଙ୍କୁ ଜୀବିତ ଅବସ୍ଥାରେ ଉଦ୍ଧାର କରିଥିଲେ। ଏନଡିଆରଏଫ୍‌ ଟିମ୍‌, ସ୍ଥାନୀୟ ପୁଲିସ ଓ ଉଦ୍ଧାରକାରୀ ଦଳ ମିଳି ଦୀର୍ଘ ସମୟ ଧରି ସର୍ଚ୍ଚ ଅପରେସନ୍‌ ଚାଲାଇଥିଲେ।

ମୃତକମାନଙ୍କ ମଧ୍ୟରେ ଲକ୍ଷ୍ମୀ ମାଦେବ ନାୟକ (୩୮), ଲକ୍ଷ୍ମୀ ଶିବରାମ ନାୟକ (୩୯), ମାଳତୀ ଜଟ୍ଟପ୍ପା ନାୟକ (୩୮), ମସ୍ତମ୍ମା ମଞ୍ଜୁନାଥ ନାୟକ (୪୩), ଲକ୍ଷ୍ମୀ ଅନ୍ନାପ୍ପା ନାୟକ (୪୪), ଜ୍ୟୋତି ନାୟକ ଓ ଉମେଶ ମଞ୍ଜୁନାଥ ନାୟକଙ୍କ ନାମ ରହିଛି।

ଘଟଣାକୁ ନେଇ କର୍ଣ୍ଣାଟକ ମୁଖ୍ୟମନ୍ତ୍ରୀ ସିଦ୍ଧାରମୈୟା ଗଭୀର ଶୋକ ପ୍ରକାଶ କରିଛନ୍ତି। ସେ ମୃତକଙ୍କ ପରିବାର ପାଇଁ ୫ ଲକ୍ଷ ଟଙ୍କାର ଆର୍ଥିକ ସହାୟତା ଘୋଷଣା କରିଛନ୍ତି। ସେ କହିଛନ୍ତି, “ଭଟକଳ ନିକଟରେ ଘଟିଥିବା ଏହି ଦୁଃଖଦ ଘଟଣା ଅତ୍ୟନ୍ତ ବେଦନାଦାୟକ। ଏପରି ଘଟଣା ରାଜ୍ୟ ପାଇଁ ଏକ ବଡ଼ ସତର୍କ ସଙ୍କେତ।”

ଏହି ଘଟଣା ପରେ କର୍ଣ୍ଣାଟକର ଉପକୂଳ ଅଞ୍ଚଳରେ ଶୋକର ଛାୟା ଖେଳିଯାଇଛି। ସେଥିସହ ନଦୀ ଓ ସମୁଦ୍ର କୂଳ ଅଞ୍ଚଳକୁ ମାଛ ଓ ଅନ୍ୟ ସମୁଦ୍ରଜ ଉତ୍ପାଦ ସଂଗ୍ରହ ପାଇଁ ଯାଉଥିବା ଗ୍ରାମବାସୀଙ୍କ ସୁରକ୍ଷାକୁ ନେଇ ପୁଣିଥରେ ଚିନ୍ତା ବଢ଼ିଛି।