ଆମେରିକା ବିଦେଶ ସଚିବ ମାର୍କୋ ରୁବିଓଙ୍କ ସହ ପ୍ରଧାନମନ୍ତ୍ରୀ ମୋଦୀଙ୍କ ଉଚ୍ଚସ୍ତରୀୟ ବୈଠକ: ହ୍ୱାଇଟ୍ ହାଉସ୍ ଆମନ୍ତ୍ରଣ ସହ ଦ୍ୱିପକ୍ଷୀୟ ସହଯୋଗ ଆଲୋଚନା

ନୂଆଦିଲ୍ଲୀ: ଆମେରିକାର ବିଦେଶ ସଚିବ ମାର୍କୋ ରୁବିଓ ନିଜ ୪ ଦିନିଆ ଭାରତ ଯାତ୍ରାରେ ନୂଆଦିଲ୍ଲୀ ପହଞ୍ଚି ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ସହ ଉଚ୍ଚସ୍ତରୀୟ ବୈଠକ କରିଛନ୍ତି। ପ୍ରାୟ ଗୋଟିଏ ଘଣ୍ଟା ଧରି ଚାଲିଥିବା ଏହି ଆଲୋଚନାରେ ଦୁଇ ଦେଶର ରଣନୀତିକ ସହଯୋଗ, ବାଣିଜ୍ୟ, ନିବେଶ, ଊର୍ଜା ସୁରକ୍ଷା ଏବଂ ଉନ୍ନତ ପ୍ରଯୁକ୍ତି ଉପରେ ଗୁରୁତ୍ୱ ଦିଆଯାଇଛି।

ବୈଠକରେ ରୁବିଓ ପ୍ରତିରକ୍ଷା ସହଯୋଗ, କ୍ରିଟିକାଲ୍ ଟେକ୍ନୋଲୋଜି, କନେକ୍ଟିଭିଟି ଏବଂ ବ୍ୟାପାର ନୀତିରେ ହୋଇଥିବା ଉନ୍ନତି ବିଷୟରେ ପ୍ରଧାନମନ୍ତ୍ରୀଙ୍କୁ ଅବଗତ କରାଇଛନ୍ତି। ସେପରି, ମଧ୍ୟପ୍ରାଚ୍ୟର ଚାଲୁଥିବା ସଂଘର୍ଷ ସ୍ଥିତି ନେଇ ଆମେରିକାର ମତାମତ ମଧ୍ୟ ଉପସ୍ଥାପନ କରିଛନ୍ତି।

ଏହାସହିତ, ଆମେରିକାର ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ପକ୍ଷରୁ ପ୍ରଧାନମନ୍ତ୍ରୀ ମୋଦୀଙ୍କୁ ହ୍ୱାଇଟ୍ ହାଉସ୍ ଆସିବା ପାଇଁ ଆଧିକାରିକ ନିମନ୍ତ୍ରଣ ଦିଆଯାଇଛି।

ପ୍ରଧାନମନ୍ତ୍ରୀ ମୋଦୀ ଏହି ବୈଠକରେ ଭାରତ ସଦା ଶାନ୍ତିର ପକ୍ଷରେ ଥିବା କଥା ପୁନରୁଚ୍ଚାରଣ କରିଛନ୍ତି ଏବଂ କୌଣସି ବିବାଦର ସମାଧାନ କେବଳ ‘ଆଲୋଚନା ଓ କୂଟନୀତି’ ମାଧ୍ୟମରେ ସମ୍ଭବ ବୋଲି କହିଛନ୍ତି।