ବିଶ୍ୱର ସର୍ବବୃହତ୍ ଟେକ୍ କମ୍ପାନୀମାନଙ୍କ ମଧ୍ୟରୁ ଗୋଟିଏ ମେଟା (Meta) ପୁଣିଥରେ ବଡ଼ ପରିମାଣର ଛାଟଣିକୁ ନେଇ ଚର୍ଚ୍ଚାରେ ଆସିଛି। କମ୍ପାନୀ ପ୍ରଥମେ କର୍ମଚାରୀଙ୍କୁ ‘ୱର୍କ ଫ୍ରମ୍ ହୋମ୍’ କରିବାକୁ ନିର୍ଦ୍ଦେଶ ଦେଇଥିବାବେଳେ, ପରେ ହଠାତ୍ ପ୍ରାୟ ୮ ହଜାର କର୍ମଚାରୀଙ୍କୁ ଛାଟଣି କରାଯାଇଥିବା ଖବର ସାମ୍ନାକୁ ଆସିଛି।
ରିପୋର୍ଟ ଅନୁଯାୟୀ, ଏହି ଛାଟଣିର ପ୍ରଭାବ ଆମେରିକା, ବ୍ରିଟେନ୍ ଓ ସିଙ୍ଗାପୁର ସହିତ ବିଭିନ୍ନ ଦେଶର କର୍ମଚାରୀଙ୍କ ଉପରେ ପଡ଼ିଛି। ସିଙ୍ଗାପୁରର କିଛି କର୍ମଚାରୀ ସ୍ଥାନୀୟ ସମୟ ସକାଳ ୪ଟାରେ ଛାଟଣି ସମ୍ବନ୍ଧୀୟ ଇମେଲ୍ ପାଇଥିବା କୁହାଯାଇଛି। କୌଣସି ପୂର୍ବ ଟାଉନହଲ୍ ବା ଆନୁଷ୍ଠାନିକ ଘୋଷଣା ବିନା ଏହି ପଦକ୍ଷେପ ନିଆଯାଇଥିବାରୁ କର୍ମଚାରୀମାନଙ୍କ ମଧ୍ୟରେ ଅସନ୍ତୋଷ ଦେଖାଦେଇଛି।
ମେଟାରେ ପୂର୍ବରୁ ପ୍ରାୟ ୭୮ ହଜାର କର୍ମଚାରୀ କାର୍ଯ୍ୟରତ ଥିଲେ। ନୂତନ ଛାଟଣି ସହ କମ୍ପାନୀ ଏବେ ତାହାର କର୍ମୀ ସଂଖ୍ୟାକୁ କମେଇବା ଦିଗରେ ପଦକ୍ଷେପ ନେଉଛି। ତେବେ କମ୍ପାନୀ କହିଛି ଯେ ପ୍ରାୟ ୭ ହଜାର କର୍ମଚାରୀଙ୍କୁ AI-କେନ୍ଦ୍ରିକ ନୂତନ ଟିମ୍ରେ ପୁନଃନିଯୁକ୍ତ କରାଯିବ।
ମେଟାର ମୁଖ୍ୟ ଅଧିକାରୀ ଜାନେଲ୍ ଗେଲ୍ କହିଛନ୍ତି ଯେ, କମ୍ପାନୀ ବର୍ତ୍ତମାନ ଛୋଟ ଏବଂ ଦ୍ରୁତ କାର୍ଯ୍ୟକ୍ଷମ ଟିମ୍ ଗଠନ ଉପରେ ଗୁରୁତ୍ୱ ଦେଉଛି। ବିଶେଷକରି ଇଞ୍ଜିନିୟରିଂ ଓ ପ୍ରଡକ୍ଟ ବିଭାଗରେ ଅଧିକ ପରିବର୍ତ୍ତନ ହେବାର ସମ୍ଭାବନା ରହିଛି।
ମାର୍କ ଜୁକରବର୍ଗଙ୍କ ନେତୃତ୍ୱରେ ମେଟା ବର୍ତ୍ତମାନ AI (Artificial Intelligence) କୁ କମ୍ପାନୀର ପ୍ରାଥମିକ କ୍ଷେତ୍ର ଭାବେ ନେଇଛି। ଏହି ବର୍ଷ AI ଓ ଟେକ୍ନୋଲୋଜି ଉନ୍ନତି ପାଇଁ କମ୍ପାନୀ ପ୍ରାୟ 125 ରୁ 145 ବିଲିୟନ୍ ଡଲାର୍ ଖର୍ଚ୍ଚ କରିବାକୁ ଯୋଜନା କରୁଛି।
ଏହି ଛାଟଣି ପରେ କମ୍ପାନୀ ଭିତରେ କର୍ମଚାରୀଙ୍କ ମନୋବଳ ହ୍ରାସ ପାଇଥିବା ଖବର ମିଳିଛି। କିଛି କର୍ମଚାରୀ AI ଟ୍ରାକିଂ ସିଷ୍ଟମ୍ ନେଇ ମଧ୍ୟ ଅସନ୍ତୋଷ ପ୍ରକାଶ କରିଥିଲେ। ଏହି ସିଷ୍ଟମ୍ ମାଉସ୍ ଚଳାଚଳ ଓ କୀଷ୍ଟ୍ରୋକ୍ ଟ୍ରାକ୍ କରୁଥିବା ନେଇ ଅଭିଯୋଗ ଉଠିଥିଲା।
ଏହା ସହିତ Cisco, Microsoft, Amazon, Disney ଓ Oracle ପରି ବଡ଼ ଟେକ୍ କମ୍ପାନୀମାନେ ମଧ୍ୟ ନିକଟରେ ଛାଟଣି ଘୋଷଣା କରିଛନ୍ତି। ଟେକ୍ ଶିଳ୍ପରେ AI ଆଧାରିତ ପୁନର୍ଗଠନ ଓ ଖର୍ଚ୍ଚ କମାଇବା ନୀତି ଫଳରେ ଏପରି ପରିସ୍ଥିତି ସୃଷ୍ଟି ହେଉଥିବା ବିଶେଷଜ୍ଞମାନେ କହୁଛନ୍ତି।
