କେନ୍ଦ୍ର ସରକାର ରୌପ୍ୟ ଆମଦାନି ନିୟମରେ ନୂତନ ସଂଶୋଧନ କରି କଡା ନିୟନ୍ତ୍ରଣ ଲାଗୁ କରିଛନ୍ତି। ଏହି ନୂତନ ନିୟମ ଅନୁସାରେ ଏବେ ବିଦେଶରୁ ରୌପ୍ୟ ଆମଦାନି ପୂର୍ବପରି ସହଜ ରହିବ ନାହିଁ, ବିଶେଷକରି ରୌପ୍ୟ ବିସ୍କୁଟ୍, ଅପ୍ରକ୍ରିୟା ରୌପ୍ୟ, ସେମି-ଫିନିସ୍ଡ ରୌପ୍ୟ ଓ ୯୯.୯% ଶୁଦ୍ଧତା ଥିବା ରୌପ୍ୟ ବାର୍‌ ଉପରେ ନିୟନ୍ତ୍ରଣ ଆସିଛି।

ପୂର୍ବରୁ ‘ଫ୍ରି କ୍ୟାଟେଗୋରି’ ଅନ୍ତର୍ଗତ ଥିବା ଏହି ଆମଦାନିକୁ ଏବେ ‘ରିସ୍ଟ୍ରିକ୍ଟେଡ୍ କ୍ୟାଟେଗୋରି’ରେ ସମ୍ମିଳିତ କରାଯାଇଛି। ଏହାର ଅର୍ଥ ହେଲା, ଏବେ ଏହି ପ୍ରକାର ରୌପ୍ୟ ଆମଦାନି ପାଇଁ ସରକାରୀ ବିଶେଷ ଅନୁମତି ଅନିବାର୍ଯ୍ୟ ହେବ।

ସେହିପରି କିଛି ବର୍ଗର ରୌପ୍ୟ ଆମଦାନିକୁ ଭାରତୀୟ ରିଜର୍ଭ ବ୍ୟାଙ୍କ (RBI) ନିୟନ୍ତ୍ରଣ ଅଧୀନରେ ମଧ୍ୟ ଆଣାଯାଇଛି। ଏହି ପଦକ୍ଷେପ ଆମଦାନି ପ୍ରକ୍ରିୟାରେ ପାରଦର୍ଶିତା ବଢ଼ାଇବା ସହିତ ଅବୈଧ ବ୍ୟବସାୟକୁ ରୋକିବା ଉଦ୍ଦେଶ୍ୟରେ ଗ୍ରହଣ କରାଯାଇଛି।

ବିଶେଷଜ୍ଞମାନଙ୍କ ମତରେ, ଏହି ନୂତନ ନିୟମ ରୌପ୍ୟ ବଜାରରେ ଆମଦାନି ପ୍ରବାହକୁ ନିୟନ୍ତ୍ରଣ କରିବ ଏବଂ ଦେଶୀୟ ବଜାରର ସ୍ଥିରତାକୁ ସୁଦୃଢ଼ କରିପାରେ।