ବିଶ୍ୱ ସ୍ୱାସ୍ଥ୍ୟ ସଂଗଠନ (WHO) ଏବେ ଇବୋଲା ଭାଇରସ୍କୁ ନେଇ ସାରା ପୃଥିବୀ ପାଇଁ ଗୁରୁତର ସତର୍କବାଣୀ ଜାରି କରିଛି। ଆଫ୍ରିକାର କଙ୍ଗୋ ଏବଂ ଉଗାଣ୍ଡାରେ ଇବୋଲା ସଂକ୍ରମଣ ଦ୍ରୁତ ଭାବେ ବଢ଼ୁଥିବାରୁ, WHO ଏହାକୁ “ଗ୍ଲୋବାଲ୍ ହେଲ୍ଥ ଏମର୍ଜେନ୍ସି” ଭାବେ ଘୋଷଣା କରିଛି। ଏହି ପଦକ୍ଷେପ ନିଆଯାଇଛି କାରଣ ଏହି ଭାଇରସ୍ ସୀମା ପାର କରି ଅନ୍ୟ ଦେଶକୁ ମଧ୍ୟ ପ୍ରସାରିତ ହେବାର ଆଶଙ୍କା ରହିଛି।
କଙ୍ଗୋର ପୂର୍ବ ଅଞ୍ଚଳର ଇତୁରି ପ୍ରଭିନ୍ସରେ ଇବୋଲା ଭୟଙ୍କର ରୂପ ନେଇଛି। ସ୍ଥାନୀୟ ସ୍ୱାସ୍ଥ୍ୟ ବିଭାଗ ଅନୁସାରେ, ଏପର୍ଯ୍ୟନ୍ତ ପ୍ରାୟ ୮୦ ଜଣଙ୍କ ମୃତ୍ୟୁ ହୋଇସାରିଛି। ଅଧିକାରୀମାନେ କହିଛନ୍ତି ଯେ ନିକଟତମ ପରୀକ୍ଷାରେ ବଣ୍ଡିବୁଗ୍ୟୋ ଷ୍ଟ୍ରେନ୍ର କିଛି ନୂଆ କେସ୍ ମଧ୍ୟ ଚିହ୍ନଟ ହୋଇଛି।
ଏପର୍ଯ୍ୟନ୍ତ ୨୪୬ରୁ ଅଧିକ ସନ୍ଦିଗ୍ଧ କେସ୍ ରିପୋର୍ଟ ହୋଇଛି। ଏହାମଧ୍ୟରେ ଏକ ନର୍ସଙ୍କ ମୃତ୍ୟୁ ମଧ୍ୟ ହୋଇଛି, ଯିଏ ଜ୍ୱର, ବାମି, ରକ୍ତସ୍ରାବ ଏବଂ ଅତ୍ୟଧିକ ଦୁର୍ବଳତା ଭଳି ଲକ୍ଷଣ ଦେଖାଇଥିଲେ।
ସ୍ଥିତି ଗମ୍ଭୀର ହେଉଥିବାରୁ WHO ସାରା ବିଶ୍ୱକୁ ସତର୍କ ରହିବାକୁ ଆହ୍ୱାନ କରିଛି ଏବଂ ସଂକ୍ରମଣ ରୋକିବା ପାଇଁ ତତ୍କାଳ ପଦକ୍ଷେପ ନେବାକୁ କହିଛି।
