ତାତିରୁ ମିଳିବ ଆଶ୍ୱସ୍ତି: ଆଗାମୀ ୨୪ ଘଣ୍ଟାରେ କେରଳ ଛୁଇଁପାରେ ମୌସୁମୀ

ଦେଶବାସୀଙ୍କ ପାଇଁ ଆସିଛି ଏକ ଖୁସି ଖବର। ଦୀର୍ଘଦିନ ଧରି ଅସହ୍ୟ ଗ୍ରୀଷ୍ମ ପ୍ରବାହ ଓ ପ୍ରଚଣ୍ଡ ତାତିରେ କଲବଲ ହେଉଥିବା ଜନଜୀବନକୁ ଖୁବ୍‌ଶୀଘ୍ର ଆଶ୍ୱସ୍ତି ମିଳିପାରେ। ଭାରତୀୟ ପାଣିପାଗ ବିଭାଗ (IMD)ର ସଦ୍ୟତମ ସୂଚନା ଅନୁଯାୟୀ, ଆଗାମୀ ୨୪ ଘଣ୍ଟା ମଧ୍ୟରେ ଦକ୍ଷିଣ-ପଶ୍ଚିମ ମୌସୁମୀ କେରଳ ଉପକୂଳରେ ପହଞ୍ଚିବାର ସମ୍ଭାବନା ରହିଛି। ମୌସୁମୀର ଆଗମନ ପରେ କେରଳ ସମେତ ଦକ୍ଷିଣ ଭାରତର ବିଭିନ୍ନ ଅଞ୍ଚଳରେ ବର୍ଷା କାର୍ଯ୍ୟକଳାପ ବଢ଼ିବା ସହ ତାପମାତ୍ରାରେ ହ୍ରାସ ଦେଖାଯିବ।

ସାଧାରଣତଃ ଦକ୍ଷିଣ-ପଶ୍ଚିମ ମୌସୁମୀ ଜୁନ୍ ୧ ତାରିଖ ସୁଦ୍ଧା କେରଳରେ ପହଞ୍ଚିଥାଏ। ତେବେ ଚଳିତ ବର୍ଷ ଏହା କିଛି ଦିନ ବିଳମ୍ବ ହୋଇଥିବା ବେଳେ ଜୁନ୍ ୪ ତାରିଖ ସୁଦ୍ଧା କେରଳ ଛୁଇଁବାର ସମ୍ଭାବନା ରହିଛି। ପ୍ରଥମେ IMD ମେ’ ୨୬ ତାରିଖରେ ମୌସୁମୀ ଆଗମନର ପୂର୍ବାନୁମାନ କରିଥିଲା, କିନ୍ତୁ ପାଗ ଅନୁକୂଳ ନ ଥିବାରୁ ଏହା ସମ୍ଭବ ହୋଇନଥିଲା।

IMD ଅନୁଯାୟୀ, ଦକ୍ଷିଣ-ପଶ୍ଚିମ ମୌସୁମୀ ଆଗାମୀ ୨୪ ଘଣ୍ଟା ମଧ୍ୟରେ କେରଳ, ତାମିଲନାଡୁର କିଛି ଅଞ୍ଚଳ, ଲକ୍ଷଦ୍ୱୀପ, ଦକ୍ଷିଣ ଓ ମଧ୍ୟ ଆରବ ସାଗରର ବିସ୍ତୃତ ଅଞ୍ଚଳ ସହ ବଙ୍ଗୋପସାଗରର ବିଭିନ୍ନ ଭାଗକୁ ଅଗ୍ରସର ହେବା ପାଇଁ ପାଗ ଅନୁକୂଳ ରହିଛି। କେରଳରେ ପ୍ରବେଶ ପରେ ମୌସୁମୀ ଧୀରେ ଧୀରେ କର୍ଣ୍ଣାଟକ, ମହାରାଷ୍ଟ୍ର ଏବଂ ପରବର୍ତ୍ତୀ ସମୟରେ ଉତ୍ତର ଭାରତ ଅଭିମୁଖେ ଅଗ୍ରସର ହେବ।

ତେବେ ଚଳିତ ବର୍ଷର ବର୍ଷା ପରିମାଣକୁ ନେଇ IMDର ଆକଳନ କିଛି ଚିନ୍ତା ବଢ଼ାଇଛି। ଜୁନ୍ ରୁ ସେପ୍ଟେମ୍ବର ମଧ୍ୟରେ ଦେଶର ମୌସୁମୀ ବର୍ଷା ସ୍ୱାଭାବିକ ସୀମାର ନିମ୍ନଭାଗରେ ରହିପାରେ ବୋଲି ବିଭାଗ ଆକଳନ କରିଛି। ବିଶେଷକରି ମଧ୍ୟ ଭାରତ, ଦକ୍ଷିଣ ଉପଦ୍ୱୀପ ଏବଂ ଉତ୍ତର-ପଶ୍ଚିମ ଭାରତରେ ସାଧାରଣଠାରୁ କମ୍ ବର୍ଷା ହେବାର ସମ୍ଭାବନା ରହିଛି।

ସେହିପରି ମୌସୁମୀର ‘କୋର ଜୋନ୍’ ଭାବେ ପରିଚିତ ଓଡ଼ିଶା ସମେତ ପୂର୍ବ ଓ ମଧ୍ୟ ଭାରତର କେତେକ ଅଞ୍ଚଳରେ ମଧ୍ୟ ଦୀର୍ଘକାଳୀନ ହାରାହାରି ତୁଳନାରେ କମ୍ ବର୍ଷା ହେବାର ସମ୍ଭାବନା ରହିଛି। ତେବେ ଉତ୍ତର ଓ ଉତ୍ତର-ପୂର୍ବ ଭାରତରେ ସ୍ୱାଭାବିକରୁ ସାମାନ୍ୟ ଅଧିକ କିମ୍ବା ସମାନ ପରିମାଣର ବର୍ଷା ହୋଇପାରେ ବୋଲି IMD ପୂର୍ବାନୁମାନ କରିଛି।

ମୌସୁମୀର ଆଗମନ ସହ ଦେଶର ବିଭିନ୍ନ ଅଞ୍ଚଳରେ ତାପପ୍ରବାହରୁ ରାହାତ ମିଳିବା ଆଶା କରାଯାଉଥିବା ବେଳେ, ବର୍ଷାର ପରିମାଣ ଓ ବିତରଣ ଉପରେ କୃଷି, ଜଳସମ୍ପଦ ଓ ସାଧାରଣ ଜନଜୀବନର ଭବିଷ୍ୟତ ନିର୍ଭର କରିବ।