ବ୍ୟାଙ୍କ୍‌ ସମ୍ମୁଖରେ ବିଷ ବୋତଲ ଧରି ମହିଳାଙ୍କ ଆତ୍ମହତ୍ୟା ଧମକ, ସବସିଡି ଟଙ୍କା ହଡ଼ପ ଅଭିଯୋଗରେ ଉତ୍ତେଜନା

ବାଲେଶ୍ୱର: ବାଲେଶ୍ୱର ଜିଲ୍ଲା ଭୋଗରାଇ ବ୍ଲକ ଚନ୍ଦନେଶ୍ୱରସ୍ଥିତ ପଞ୍ଜାବ ନ୍ୟାସନାଲ ବ୍ୟାଙ୍କ (PNB) ସମ୍ମୁଖରେ ଶୁକ୍ରବାର ଏକ ଅଭାବନୀୟ ପରିସ୍ଥିତି ସୃଷ୍ଟି ହୋଇଥିଲା। ଜଣେ ମହିଳା ବିଷ ବୋତଲ ଧରି ବ୍ୟାଙ୍କ ସମ୍ମୁଖରେ ଆତ୍ମହତ୍ୟା କରିବାକୁ ଧମକ ଦେବା ସହ ବ୍ୟାଙ୍କ ମ୍ୟାନେଜରଙ୍କ ବିରୋଧରେ ଗୁରୁତର ଅଭିଯୋଗ ଆଣିଥିଲେ। ଘଟଣାକୁ ନେଇ ବ୍ୟାଙ୍କ ପରିସରରେ କିଛି ସମୟ ପାଇଁ ଉତ୍ତେଜନା ଦେଖାଦେଇଥିଲା।

ଅଭିଯୋଗ ଅନୁସାରେ, ସମ୍ପୃକ୍ତ ମହିଳା ବ୍ୟାଙ୍କରୁ ପ୍ରାୟ ୭ ଲକ୍ଷ ୫୬ ହଜାର ଟଙ୍କାର ଋଣ ନେଇଥିଲେ। କିନ୍ତୁ ତାଙ୍କ କହିବା ଅନୁଯାୟୀ, ବ୍ୟାଙ୍କ ପକ୍ଷରୁ ତାଙ୍କୁ କେବଳ ୪ ଲକ୍ଷ ୫୬ ହଜାର ଟଙ୍କା ପ୍ରଦାନ କରାଯାଇଥିଲା ଏବଂ ଅବଶିଷ୍ଟ ୩ ଲକ୍ଷ ଟଙ୍କା ଉଠାଇବାକୁ ଦିଆଯାଇନଥିଲା। ଏହି ଟଙ୍କା ସବସିଡି ବାବଦରେ ଥିଲା ଏବଂ ବ୍ୟାଙ୍କ ମ୍ୟାନେଜର ଏହାକୁ ହଡ଼ପ କରିଥିବା ମହିଳା ଅଭିଯୋଗ କରିଛନ୍ତି।

ମହିଳାଙ୍କ କହିବା ଅନୁଯାୟୀ, ସେ ଏହି ସମସ୍ୟା ନେଇ ବାରମ୍ବାର ବ୍ୟାଙ୍କ କର୍ତ୍ତୃପକ୍ଷଙ୍କ ଦ୍ୱାରସ୍ଥ ହୋଇଥିଲେ ମଧ୍ୟ କୌଣସି ସମାଧାନ ହୋଇନଥିଲା। ଫଳରେ ସେ ଅତିଷ୍ଠ ହୋଇ ବ୍ୟାଙ୍କ ସମ୍ମୁଖରେ ବିଷ ବୋତଲ ଧରି ପ୍ରତିବାଦ କରିଥିଲେ। ଏପରିକି, ତାଙ୍କ ଅଭିଯୋଗର ସମାଧାନ ନ ହେଲେ ବିଷ ପିଇ ଜୀବନ ଶେଷ କରିଦେବେ ବୋଲି ଚେତାବନୀ ମଧ୍ୟ ଦେଇଥିଲେ। ଘଟଣା ସମୟରେ ସେ ବ୍ୟାଙ୍କ ମ୍ୟାନେଜରଙ୍କୁ ଅଟକ ରଖିଥିବା ସୂଚନା ମିଳିଛି।

ଘଟଣାର ଖବର ପାଇ ସ୍ଥାନୀୟ ଲୋକମାନେ ବ୍ୟାଙ୍କ ପରିସରରେ ଏକତ୍ରିତ ହୋଇଥିବା ବେଳେ କିଛି ସମୟ ପାଇଁ ଚାପା ଉତ୍ତେଜନା ଲାଗି ରହିଥିଲା। ପରେ ସ୍ଥାନୀୟ ପ୍ରଶାସନ ଓ ପୁଲିସ ଘଟଣାସ୍ଥଳରେ ପହଞ୍ଚି ମହିଳାଙ୍କୁ ବୁଝାସୁଝା କରିବା ସହ ପରିସ୍ଥିତିକୁ ନିୟନ୍ତ୍ରଣକୁ ଆଣିଥିବା ସୂଚନା ମିଳିଛି।

ତେବେ ମହିଳାଙ୍କ ଅଭିଯୋଗର ସତ୍ୟତା ସମ୍ପର୍କରେ ବ୍ୟାଙ୍କ କର୍ତ୍ତୃପକ୍ଷଙ୍କ ପକ୍ଷରୁ ଏପର୍ଯ୍ୟନ୍ତ କୌଣସି ସରକାରୀ ପ୍ରତିକ୍ରିୟା ମିଳିନାହିଁ। ଘଟଣାର ତଦନ୍ତ ପରେ ପ୍ରକୃତ ସତ୍ୟ ସାମ୍ନାକୁ ଆସିବ ବୋଲି ଆଶା କରାଯାଉଛି।