ବାରଙ୍ଗରେ ଦୁଇ ମନ୍ଦିରରେ ବଡ଼ ଲୁଟ୍: ଲକ୍ଷାଧିକ ଟଙ୍କାର ସୁନା-ରୁପା ଅଳଙ୍କାର ଓ ହୁଣ୍ଡି ଲୁଟ୍

ବାରଙ୍ଗ: ରାଜଧାନୀ ଉପକଣ୍ଠ ବାରଙ୍ଗରେ ଘଟିଛି ଏକ ବଡ଼ ଧରଣର ମନ୍ଦିର ଲୁଟ୍। ଗତ ବିଳମ୍ବିତ ରାତିରେ ସ୍ଥାନୀୟ ପ୍ରସିଦ୍ଧ ଶ୍ରୀ ଦଧିବାମନ ମନ୍ଦିର ଏବଂ ମା’ କନକ ଦୁର୍ଗା ମନ୍ଦିରରେ ଏକାସଙ୍ଗେ ଦୁର୍ବୃତ୍ତମାନେ ତାଲା ଭାଙ୍ଗି ପ୍ରବେଶ କରି ଠାକୁର-ଠାକୁରାଣୀଙ୍କ ସୁନା, ରୁପା ଅଳଙ୍କାର ସହ ଦାନ ବାକ୍ସରେ ଥିବା ନଗଦ ଅର୍ଥ ଲୁଟି ନେଇଥିବା ଅଭିଯୋଗ ହୋଇଛି। ପ୍ରାଥମିକ ଆକଳନ ଅନୁସାରେ, ଲୁଟ୍‌ର ପରିମାଣ ଲକ୍ଷାଧିକ ଟଙ୍କା ହୋଇଥିବା କୁହାଯାଉଛି।

ଆଜି ସକାଳେ ସେବାୟତମାନେ ମନ୍ଦିର ଖୋଲିବାକୁ ଆସିବା ବେଳେ ତାଲା ଭଙ୍ଗା ଓ ମନ୍ଦିର ଭିତରେ ସାମଗ୍ରୀ ବିକ୍ଷିପ୍ତ ଅବସ୍ଥାରେ ପଡ଼ିଥିବା ଦେଖିଥିଲେ। ଘଟଣା ଜଣାପଡ଼ିବା ପରେ ଅଞ୍ଚଳରେ ଚାଞ୍ଚଲ୍ୟ ଖେଳିଯାଇଥିବାବେଳେ ଶହ ଶହ ଶ୍ରଦ୍ଧାଳୁ ଓ ସ୍ଥାନୀୟ ଲୋକ ମନ୍ଦିର ପରିସରରେ ଏକତ୍ରିତ ହୋଇଥିଲେ। ପବିତ୍ର ଦେବାଳୟରେ ଏଭଳି ଦୁଃସାହସିକ ଲୁଟ୍ ଘଟଣାକୁ ନେଇ ଅଞ୍ଚଳବାସୀଙ୍କ ମଧ୍ୟରେ ଗଭୀର ଅସନ୍ତୋଷ ପ୍ରକାଶ ପାଇଛି।

ଖବର ପାଇ ବାରଙ୍ଗ ଥାନା ପୋଲିସ ବୈଜ୍ଞାନିକ ଟିମ୍ ସହ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛି। ମନ୍ଦିର ପରିସର ଏବଂ ଆଖପାଖରେ ଲାଗିଥିବା CCTV ଫୁଟେଜ୍ ଯାଞ୍ଚ କରାଯାଉଥିବା ସହ ଦୁର୍ବୃତ୍ତଙ୍କୁ ଚିହ୍ନଟ କରିବାକୁ ପୋଲିସ ପ୍ରୟାସ ଜାରି ରଖିଛି। ଘଟଣାର ପ୍ରକୃତ କ୍ଷୟକ୍ଷତି ଆକଳନ କରାଯାଉଥିବାବେଳେ ମନ୍ଦିର କମିଟି ପକ୍ଷରୁ ଲିଖିତ ଅଭିଯୋଗ ଦାଖଲ କରାଯାଇଛି।

ଅପଡେଟ୍: ପୋଲିସ ପକ୍ଷରୁ ସନ୍ଦେହଜନକ ବ୍ୟକ୍ତିଙ୍କ ଗତିବିଧି ଓ CCTV ଫୁଟେଜ୍‌କୁ ଆଧାର କରି ତଦନ୍ତ ଜୋରଦାର କରାଯାଇଛି। ଲୁଟ୍‌ରେ ସମ୍ପୃକ୍ତ ଦୁର୍ବୃତ୍ତଙ୍କୁ ଖୁବ୍‌ଶୀଘ୍ର ଗିରଫ କରାଯିବ ବୋଲି ପୋଲିସ ଆଶା ପ୍ରକାଶ କରିଛି। ଏହି ଘଟଣା ପରେ ଅଞ୍ଚଳର ପ୍ରମୁଖ ମନ୍ଦିରଗୁଡ଼ିକର ସୁରକ୍ଷା ବ୍ୟବସ୍ଥାକୁ ଆହୁରି କଡ଼ାକଡ଼ି କରିବାକୁ ସ୍ଥାନୀୟ ଲୋକ ଦାବି କରିଛନ୍ତି।