କେନ୍ଦ୍ର ସରକାରର ମନ୍ତ୍ରିମଣ୍ଡଳରେ ଆସନ୍ତା ଜୁନ୍ ମାସରେ ବଡ଼ ଧରଣର ପୁନର୍ଗଠନ ହେବାର ସମ୍ଭାବନା ନେଇ ରାଜନୈତିକ ମହଳରେ ଚର୍ଚ୍ଚା ଜୋର ଧରିଛି। ସୂତ୍ର ଅନୁସାରେ, ଜୁନ୍ ୧୫ରୁ ୧୮ ମଧ୍ୟରେ କେନ୍ଦ୍ର ମନ୍ତ୍ରିମଣ୍ଡଳର ସମ୍ପ୍ରସାରଣ ଓ ପୁନର୍ଗଠନ ହୋଇପାରେ। ଏଥିରେ କେତେକ ମନ୍ତ୍ରୀଙ୍କ ଦାୟିତ୍ୱ ପରିବର୍ତ୍ତନ ସହ ନୂଆ ମୁହଁଙ୍କୁ ସୁଯୋଗ ମିଳିପାରେ।
ଦଳୀୟ ସୂତ୍ରରୁ ମିଳୁଥିବା ସୂଚନା ଅନୁଯାୟୀ, ୨୦୨୭ରେ ହେବାକୁ ଥିବା ବିଭିନ୍ନ ରାଜ୍ୟର ବିଧାନସଭା ନିର୍ବାଚନକୁ ଦୃଷ୍ଟିରେ ରଖି ବିଜେପି ସାଂଗଠନିକ ଏବଂ ରାଜନୈତିକ ସ୍ତରରେ ବଡ଼ ପରିବର୍ତ୍ତନ ପାଇଁ ପ୍ରସ୍ତୁତି ଚଳାଇଛି। ଏହି ପରିପ୍ରେକ୍ଷୀରେ ୧୨ରୁ ଅଧିକ କେନ୍ଦ୍ର ମନ୍ତ୍ରୀଙ୍କ ବିଭାଗ ବଦଳିପାରେ କିମ୍ବା କିଛି ମନ୍ତ୍ରୀଙ୍କୁ ମନ୍ତ୍ରିମଣ୍ଡଳରୁ ବାଦ ଦିଆଯାଇପାରେ।
ଚର୍ଚ୍ଚା ହେଉଛି ଯେ, ଅତି କମରେ ଦୁଇଜଣ କ୍ୟାବିନେଟ୍ ମନ୍ତ୍ରୀ ଓ କିଛି ରାଷ୍ଟ୍ରମନ୍ତ୍ରୀଙ୍କ ଭୂମିକାରେ ପରିବର୍ତ୍ତନ ଆସିପାରେ। ସେହିପରି କେତେକ ବରିଷ୍ଠ ନେତାଙ୍କୁ ଦଳୀୟ ସଂଗଠନରେ ଗୁରୁତ୍ୱପୂର୍ଣ୍ଣ ଦାୟିତ୍ୱ ଦେବା ପାଇଁ କେନ୍ଦ୍ର ମନ୍ତ୍ରିମଣ୍ଡଳରୁ ଅବ୍ୟାହତି ଦିଆଯାଇପାରେ।
ଏହି ସମ୍ଭାବ୍ୟ ପୁନର୍ଗଠନରେ ରେଳ, ଅର୍ଥ, କୃଷି, ଗ୍ରାମୀଣ ବିକାଶ, ଜଳ ଶକ୍ତି, କୋଇଲା, ଆଇନ, ପରିବେଶ, ସୂଚନା ଓ ପ୍ରସାରଣ, ଇଲେକ୍ଟ୍ରୋନିକ୍ସ ଏବଂ ଆଇଟି ଭଳି ଗୁରୁତ୍ୱପୂର୍ଣ୍ଣ ମନ୍ତ୍ରଣାଳୟରେ ମଧ୍ୟ ପରିବର୍ତ୍ତନ ହେବାର ଆଶଙ୍କା ରହିଛି।
ଅନ୍ୟପଟେ, ଏନ୍ଡିଏର ସହଯୋଗୀ ଦଳ ଜେଡି(ୟୁ), ଟିଡିପି, ଏନ୍ସିପି ଓ ଅନ୍ୟାନ୍ୟ ସହଯୋଗୀ ଦଳକୁ ମଧ୍ୟ ଅଧିକ ପ୍ରତିନିଧିତ୍ୱ ଦେବା ଉପରେ ବିଚାର ଚାଲିଥିବା ସୂଚନା ମିଳିଛି। କିଛି ସହଯୋଗୀ ଦଳର ନେତାଙ୍କୁ କ୍ୟାବିନେଟ୍ କିମ୍ବା ରାଷ୍ଟ୍ରମନ୍ତ୍ରୀ ପଦ ମିଳିପାରେ।
ବିଜେପି ଆଗାମୀ ନିର୍ବାଚନକୁ ଦୃଷ୍ଟିରେ ରଖି ରାଜ୍ୟ ସ୍ତରରେ ମଧ୍ୟ ସାଂଗଠନିକ ପରିବର୍ତ୍ତନ ଆରମ୍ଭ କରିଛି। ଉତ୍ତର ପ୍ରଦେଶ, ଦିଲ୍ଲୀ, କର୍ଣ୍ଣାଟକ ଓ ମଣିପୁର ଭଳି ରାଜ୍ୟରେ ନୂଆ ନେତୃତ୍ୱ ଚୟନ ପ୍ରକ୍ରିୟା ଜାରି ରହିଛି।
ତେବେ କ୍ୟାବିନେଟ୍ ପୁନର୍ଗଠନକୁ ନେଇ ସରକାର କିମ୍ବା ବିଜେପି ପକ୍ଷରୁ ଏପର୍ଯ୍ୟନ୍ତ କୌଣସି ଔପଚାରିକ ଘୋଷଣା କରାଯାଇନାହିଁ। ତଥାପି ଜୁନ୍ ମାସରେ କେନ୍ଦ୍ର ରାଜନୀତିରେ ବଡ଼ ପରିବର୍ତ୍ତନ ଦେଖିବାକୁ ମିଳିପାରେ ବୋଲି ଚର୍ଚ୍ଚା ଜୋର ଧରିଛି।
