କାଳବୈଶାଖୀ ବର୍ଷା ସହ ବଜ୍ରପାତର ତାଣ୍ଡବ: ରାଜ୍ୟର ୩ ସ୍ଥାନରେ ୩ ମୃତ, ଭଦ୍ରକରେ ମାଆଙ୍କୁ ଆଣିବାକୁ ଯାଇ ପ୍ରାଣ ହରାଇଲା ୧୦ ବର୍ଷର ପୁଅ
ରାଜ୍ୟର ବିଭିନ୍ନ ଅଞ୍ଚଳରେ କାଳବୈଶାଖୀ ଜନିତ ବର୍ଷା ଓ ବଜ୍ରପାତ ଯୋଗୁଁ ତିନି ଜଣଙ୍କ ମୃତ୍ୟୁ ଘଟିଥିବା ବେଳେ ଦୁଇ ଜଣ ଆହତ ହୋଇଛନ୍ତି। ଭଦ୍ରକ, ମୟୂରଭଞ୍ଜ ଓ ଯାଜପୁର ଜିଲ୍ଲାରୁ ଏହି ଦୁଃଖଦ ଘଟଣା ସାମ୍ନାକୁ ଆସିଛି।
ସବୁଠାରୁ ମର୍ମନ୍ତୁଦ ଘଟଣା ଭଦ୍ରକ ଜିଲ୍ଲାର ବନ୍ଧଗାଁ ପଞ୍ଚାୟତ ଅନ୍ତର୍ଗତ ସାମଲ ସାହିରେ ଘଟିଛି। ରବିବାର ଅପରାହ୍ଣରେ କାଳବୈଶାଖୀ ବର୍ଷା ସମୟରେ ଜଣେ ମହିଳା ଗୁହାଳ ଘରେ ଗାଈଗୋରୁଙ୍କ ଦେଖାଶୁଣା କରୁଥିଲେ। ତାଙ୍କୁ ଘରକୁ ଆଣିବା ପାଇଁ ତାଙ୍କ ୧୦ ବର୍ଷର ପୁଅ ଛତା ଧରି ଗୁହାଳ ଆଡ଼କୁ ଯାଉଥିବା ବେଳେ ହଠାତ୍ ବଜ୍ରପାତ ହୋଇଥିଲା। ବଜ୍ରାଘାତରେ ଶିଶୁଟି ଗୁରୁତର ଆହତ ହୋଇ ପଡ଼ିଥିଲା। ପରିବାର ଲୋକେ ତୁରନ୍ତ ତାକୁ ଭଦ୍ରକ ଜିଲ୍ଲା ମୁଖ୍ୟ ଚିକିତ୍ସାଳୟକୁ ନେଇଥିଲେ ମଧ୍ୟ ଡାକ୍ତର ତାକୁ ମୃତ ଘୋଷଣା କରିଥିଲେ।
ସେହିପରି ମୟୂରଭଞ୍ଜ ଜିଲ୍ଲାର ସାରସକଣା ବ୍ଲକରେ ବଜ୍ରାଘାତରେ ଜଣେ ମହିଳାଙ୍କ ମୃତ୍ୟୁ ଘଟିଛି। ଶଙ୍ଖାଭଙ୍ଗା ଗାଁର କସ୍ତୁରୀମଣି ସିଂ ବଜ୍ରପାତର ଶିକାର ହୋଇଥିବା ବେଳେ ଦରଖୁଳି ଗାଁର ଗୁରୁବାରୀ ମାହାଲି ଓ ସନିଆ ମାହାଲି ଆହତ ହୋଇଛନ୍ତି। ଉଭୟଙ୍କୁ ଚିକିତ୍ସା ପାଇଁ ସ୍ୱାସ୍ଥ୍ୟ କେନ୍ଦ୍ରରେ ଭର୍ତ୍ତି କରାଯାଇଛି।
ଯାଜପୁର ଜିଲ୍ଲାର ଧର୍ମଶାଳା ବ୍ଲକ ଗୁଣ୍ଡିଲୋ ଗାଁରେ ମଧ୍ୟ ବଜ୍ରାଘାତ ଜଣେ ଯୁବ ଚାଷୀଙ୍କ ଜୀବନ ନେଇଛି। ସଂଗ୍ରାମ ନାୟକ ନାମକ ଏହି ଚାଷୀ ଟ୍ରାକ୍ଟର ନେଇ ଚାଷ କାମ ପାଇଁ ବିଲକୁ ଯାଇଥିବା ବେଳେ ବଜ୍ରପାତର ଶିକାର ହୋଇଥିଲେ। ଘଟଣାସ୍ଥଳରେ ହିଁ ତାଙ୍କ ମୃତ୍ୟୁ ଘଟିଥିବା ସୂଚନା ମିଳିଛି।
କାଳବୈଶାଖୀ ଋତୁରେ ବଜ୍ରପାତ ଘଟଣା ବୃଦ୍ଧି ପାଉଥିବାରୁ ପାଣିପାଗ ବିଭାଗ ଲୋକମାନଙ୍କୁ ସତର୍କ ରହିବାକୁ ପରାମର୍ଶ ଦେଇଛି। ବଜ୍ରପାତ ସମୟରେ ଖୋଲା ସ୍ଥାନ, ଗଛ ତଳ ଓ ଚାଷଜମିରେ ରହିବା ଠାରୁ ଦୂରେଇ ରହିବାକୁ ଅନୁରୋଧ କରାଯାଇଛି।
