ରାଗିଂ ବିରୋଧରେ ଆକ୍ସନ୍ ମୋଡ୍ରେ ଉଚ୍ଚଶିକ୍ଷା ବିଭାଗ । ଓଡ଼ିଶାର ସମସ୍ତ ସରକାରୀ ଓ ବେସରକାରୀ ଉଚ୍ଚଶିକ୍ଷାନୁଷ୍ଠାନରେ ରାଗିଂ ରୋକିବା ପାଇଁ ବିଭାଗ କଡ଼ା ପଦକ୍ଷେପ ନେଇଛି । ଏନେଇ ସମସ୍ତ ବିଶ୍ୱବିଦ୍ୟାଳୟର ରେଜିଷ୍ଟ୍ରାର ଏବଂ ଡିଗ୍ରୀ, ସଂସ୍କୃତ ଓ ଶିକ୍ଷକ ଶିକ୍ଷା କଲେଜର ଅଧ୍ୟକ୍ଷମାନଙ୍କୁ ନୂଆ ନିର୍ଦ୍ଦେଶ ଜାରି କରାଯାଇଛି ।
ଜାତୀୟ ମାନବାଧିକାର ଆୟୋଗ ର ସୁପାରିଶ ଏବଂ ସୁପ୍ରିମକୋର୍ଟଙ୍କ ରାୟକୁ ଆଧାର କରି ଶିକ୍ଷାନୁଷ୍ଠାନରେ ଆଣ୍ଟି-ରାଗିଂ ବ୍ୟବସ୍ଥାକୁ ଆହୁରି ସୁଦୃଢ଼ କରିବାକୁ କୁହାଯାଇଛି ।
ନୂଆ ନିର୍ଦ୍ଦେଶ ଅନୁସାରେ, ପ୍ରତ୍ୟେକ ଶିକ୍ଷାନୁଷ୍ଠାନରେ ଆଣ୍ଟି-ରାଗିଂ କମିଟି, ସ୍କ୍ୱାଡ୍ ଓ ମନିଟରିଂ ସେଲ୍କୁ ପୁନର୍ଗଠନ କରି ସକ୍ରିୟ ରଖିବାକୁ ନିର୍ଦ୍ଦେଶ ଦିଆଯାଇଛି । ବିଶେଷକରି ହଷ୍ଟେଲ୍ ଓ କ୍ୟାମ୍ପସର ସମ୍ବେଦନଶୀଳ ଅଞ୍ଚଳରେ ୨୪ ଘଣ୍ଟିଆ ନଜରଦାରି ବ୍ୟବସ୍ଥା କରିବାକୁ କୁହାଯାଇଛି ।
ଏହାସହ ନିୟମିତ ଓ ଅଚମ୍କା ଯାଞ୍ଚ କରି ତାହାର ରେକର୍ଡ ରଖିବାକୁ ମଧ୍ୟ ବିଭାଗ ପକ୍ଷରୁ ତାଗିଦ ଦିଆଯାଇଛି ।
