ଅମ୍ପାୟାରଙ୍କ ଉପରକୁ ବରଫ ପ୍ୟାକ୍ ଫିଙ୍ଗି ଅଡୁଆରେ ଟିମ୍ ଡେଭିଡ୍, IPL 2027ର ପ୍ରଥମ ମ୍ୟାଚରୁ ନିଲମ୍ବିତ
ନୂଆଦିଲ୍ଲୀ: ଆଇପିଏଲ୍ 2026 ଫାଇନାଲ୍ ପରେ ରୟାଲ୍ ଚ୍ୟାଲେଞ୍ଜର୍ସ ବେଙ୍ଗାଲୁରୁ (RCB)ର ଅଲରାଉଣ୍ଡର ଟିମ୍ ଡେଭିଡଙ୍କ ବିରୋଧରେ ବିସିସିଆଇ କଠୋର କାର୍ଯ୍ୟାନୁଷ୍ଠାନ ନେଇଛି। ମ୍ୟାଚ୍ ସମୟରେ ଅମ୍ପାୟାର ନୀତିନ ମେନନଙ୍କ ପ୍ରତି ଅନୁଚିତ ଆଚରଣ କରିଥିବା ଅଭିଯୋଗରେ ତାଙ୍କୁ IPL 2027ର ପ୍ରଥମ ମ୍ୟାଚରୁ ନିଲମ୍ବିତ କରାଯାଇଛି।
ସୂଚନା ଅନୁଯାୟୀ, ଅହମ୍ମଦାବାଦର ନରେନ୍ଦ୍ର ମୋଦୀ ଷ୍ଟାଡିୟମରେ ଖେଳାଯାଇଥିବା IPL 2026 ଫାଇନାଲ୍ ମ୍ୟାଚ୍ରେ ଟିମ୍ ଡେଭିଡ୍ ନିଜ ୱିକେଟ୍ ପଡ଼ିବା ପରେ ରାଗିଯାଇ ଡଗ୍ଆଉଟ୍ରୁ ଅମ୍ପାୟାର ନୀତିନ ମେନନଙ୍କ ଆଡ଼କୁ ଏକ ଆଇସ୍ ପ୍ୟାକ୍ (ବରଫ ପ୍ୟାକେଟ୍) ଫିଙ୍ଗିଥିଲେ। ଏହି ଘଟଣା ଇନିଂସର 10ମ ଓଭର ସମୟରେ ଘଟିଥିବା କୁହାଯାଇଛି।
ଏହାକୁ ଗୁରୁତର ଆଚରଣ ସଂହିତା ଉଲ୍ଲଙ୍ଘନ ଭାବେ ବିବେଚନା କରି IPL ଗଭର୍ନିଂ କାଉନ୍ସିଲ୍ ଓ ବିସିସିଆଇ ଟିମ୍ ଡେଭିଡଙ୍କ ଉପରେ ମ୍ୟାଚ୍ ଫିର 50 ପ୍ରତିଶତ ଜରିମାନା ଲଗାଇବା ସହ ଦୁଇଟି ଡିମେରିଟ୍ ପଏଣ୍ଟ ପ୍ରଦାନ କରିଛି।
ଡେଭିଡଙ୍କ ବିରୋଧରେ ପୂର୍ବରୁ ତିନୋଟି ଡିମେରିଟ୍ ପଏଣ୍ଟ ଥିବାରୁ ବର୍ତ୍ତମାନ ତାଙ୍କ ମୋଟ ପଏଣ୍ଟ ସଂଖ୍ୟା ପାଞ୍ଚରେ ପହଞ୍ଚିଛି। IPL ଆଚରଣ ସଂହିତା ଅନୁସାରେ ପାଞ୍ଚ ଡିମେରିଟ୍ ପଏଣ୍ଟ ହେଲେ ଖେଳାଳିଙ୍କୁ ଗୋଟିଏ ମ୍ୟାଚ୍ ପାଇଁ ନିଲମ୍ବିତ କରାଯାଏ। ଫଳରେ ଟିମ୍ ଡେଭିଡ୍ IPL 2027ର ପ୍ରଥମ ମ୍ୟାଚ୍ରେ ନିଜ ଦଳ ପାଇଁ ଉପଲବ୍ଧ ରହିବେ ନାହିଁ।
ମ୍ୟାଚ୍ ରେଫରି ଜାଭାଗଲ୍ ଶ୍ରୀନାଥଙ୍କ ନିଷ୍ପତ୍ତିକୁ ଡେଭିଡ୍ ଗ୍ରହଣ କରିଥିବା ସହ ନିଜ ଭୁଲକୁ ସ୍ୱୀକାର ମଧ୍ୟ କରିଛନ୍ତି। ତେଣୁ ଏହି ମାମଲାରେ ଆଉ କୌଣସି ଶୁଣାଣିର ଆବଶ୍ୟକତା ପଡ଼ିନାହିଁ।
ଅନ୍ୟପକ୍ଷରେ IPL 2026ରେ RCB ପାଇଁ ଖେଳୁଥିବା କୃଣାଲ ପାଣ୍ଡ୍ୟା ତାଙ୍କ କ୍ୟାରିୟରର ପଞ୍ଚମ IPL ଟାଇଟଲ୍ ଜିତି ଏକ ନୂଆ କୀର୍ତ୍ତିମାନ ସ୍ଥାପନ କରିଛନ୍ତି। ସେ ଏହି ସିଜନରେ ବ୍ୟାଟ୍ରେ 226 ରନ୍ କରିଥିବାବେଳେ ବଲ୍ରେ 14ଟି ୱିକେଟ୍ ନେଇ ଦଳର ସଫଳତାରେ ଗୁରୁତ୍ୱପୂର୍ଣ୍ଣ ଭୂମିକା ନିଭାଇଥିଲେ।
ଟିମ୍ ଡେଭିଡଙ୍କ ଏହି ବିବାଦୀୟ ଆଚରଣ ଏବେ କ୍ରିକେଟ୍ ମହଲରେ ଚର୍ଚ୍ଚାର ବିଷୟ ପାଲଟିଥିବାବେଳେ, ଖେଳାଳିଙ୍କ ଶୃଙ୍ଖଳା ଓ ମାଠରେ ଆଚରଣକୁ ନେଇ ପୁଣିଥରେ ପ୍ରଶ୍ନ ଉଠିଛି।
