ମୟୁରଭଞ୍ଜ: ଓଡ଼ିଶା ସରକାରଙ୍କ ‘ଜନତାଙ୍କ ପାଖରେ ସରକାର’ ଭାବନାକୁ ଆହୁରି ସୁଦୃଢ଼ କରିବା ଦିଗରେ ଏକ ଅଭିନବ ପଦକ୍ଷେପ ଦେଖିବାକୁ ମିଳିଛି। ମୟୁରଭଞ୍ଜର ଶ୍ରୀରାମ ଚନ୍ଦ୍ର ଭଞ୍ଜଦେଓ ବିଶ୍ୱବିଦ୍ୟାଳୟ ପରିସରରେ ଉପମୁଖ୍ୟମନ୍ତ୍ରୀ ପ୍ରଭାତୀ ପରିଡା ସ୍ୱୟଂ ପହଞ୍ଚି ୨୬ଟି ବ୍ଲକର ଅଙ୍ଗନବାଡି କର୍ମୀଙ୍କ ସହ ସିଧାସଳଖ ଆଲୋଚନା କରି ସେମାନଙ୍କ ଅଭିଜ୍ଞତା, ସମସ୍ୟା ଓ ପ୍ରସ୍ତାବ ଶୁଣିଥିଲେ। ଦୀର୍ଘଦିନ ଧରି ଅଙ୍ଗନବାଡି କେନ୍ଦ୍ରଗୁଡ଼ିକରେ ରହିଥିବା ମୌଳିକ ସମସ୍ୟା ସମ୍ପର୍କରେ କର୍ମୀମାନେ ଖୋଲାମେଳା ଭାବେ ନିଜ ମତ ରଖିଥିଲେ।

କାର୍ଯ୍ୟକ୍ରମରେ ଅଙ୍ଗନବାଡି କର୍ମୀମାନେ କେନ୍ଦ୍ରର ନିଜସ୍ୱ ଭବନର ଅଭାବ, ପାଚେରୀ ନିର୍ମାଣ, ବିଶୁଦ୍ଧ ପାନୀୟ ଜଳ, ଶୌଚାଳୟ, ମୋବାଇଲ ନେଟୱର୍କ ସମସ୍ୟା, ଶିଶୁମାନଙ୍କ ପାଇଁ ଉନ୍ନତ ପୁଷ୍ଟିକର ଖାଦ୍ୟ ବ୍ୟବସ୍ଥା ସହ ବିଭିନ୍ନ ଭିତ୍ତିଭୂମିଗତ ଅସୁବିଧା ଉଠାଇଥିଲେ। ଉପମୁଖ୍ୟମନ୍ତ୍ରୀ ପ୍ରତ୍ୟେକ ଦାବି ଓ ସମସ୍ୟାକୁ ଗୁରୁତ୍ୱର ସହ ଟିପ୍ପଣୀ କରି ସମ୍ପୃକ୍ତ ବିଭାଗ ମାଧ୍ୟମରେ ପର୍ଯ୍ୟାୟକ୍ରମେ ସମାଧାନ କରାଯିବ ବୋଲି ଆଶ୍ୱାସନ ଦେଇଥିଲେ।

ଏହି ଅବସରରେ ପ୍ରଭାତୀ ପରିଡା କହିଥିଲେ ଯେ, **“ଅଙ୍ଗନବାଡି କର୍ମୀମାନେ ପ୍ରତ୍ୟେକ ଘରର ମା’। ମା’ ଓ ଶିଶୁଙ୍କ ସ୍ୱାସ୍ଥ୍ୟ, ପୁଷ୍ଟି ଏବଂ ପ୍ରାଥମିକ ଶିକ୍ଷାର ମୂଳ ଦାୟିତ୍ୱ ସେମାନେ ନିଷ୍ଠାର ସହ ପାଳନ କରୁଛନ୍ତି। ସେମାନଙ୍କ ସୁବିଧା ହେଲେ ଅଙ୍ଗନବାଡି ବ୍ୟବସ୍ଥା ଆହୁରି ସଶକ୍ତ ହେବ ଏବଂ ଶିଶୁ ବିକାଶ କାର୍ଯ୍ୟକ୍ରମ ଅଧିକ ପ୍ରଭାବଶାଳୀ ହୋଇପାରିବ।”** ସେ କର୍ମୀମାନଙ୍କୁ ଅନ୍ୟମାନଙ୍କ ସେବା ସହିତ ନିଜ ସ୍ୱାସ୍ଥ୍ୟ ଓ ସୁରକ୍ଷାର ମଧ୍ୟ ଯତ୍ନ ନେବାକୁ ପରାମର୍ଶ ଦେଇଥିଲେ।

କାର୍ଯ୍ୟକ୍ରମରେ ଗୃହ ଓ ନଗର ଉନ୍ନୟନ ମନ୍ତ୍ରୀ କୃଷ୍ଣଚନ୍ଦ୍ର ମହାପାତ୍ର, ବାରିପଦା ବିଧାୟକ ପ୍ରକାଶ ସୋରେନ, ମୟୁରଭଞ୍ଜ ଜିଲ୍ଲାପାଳ ହେମାକାନ୍ତ ସୟ, ଅତିରିକ୍ତ ଜିଲ୍ଲାପାଳ ଦୁଃଖବନ୍ଧୁ ନାୟକଙ୍କ ସମେତ ବହୁ ପ୍ରଶାସନିକ ଅଧିକାରୀ ଓ ଜନପ୍ରତିନିଧି ଉପସ୍ଥିତ ଥିଲେ। ଏହି ସିଧାସଳଖ ସଂଳାପ ମାଧ୍ୟମରେ ସରକାର ଅଙ୍ଗନବାଡି ବ୍ୟବସ୍ଥାର ବିକାଶ ଏବଂ କର୍ମୀମାନଙ୍କ ସମସ୍ୟାର ଶୀଘ୍ର ସମାଧାନ ପ୍ରତି ପ୍ରତିବଦ୍ଧ ବୋଲି ସ୍ପଷ୍ଟ ସନ୍ଦେଶ ଦେଇଛନ୍ତି।