ଗଞ୍ଜାମ:
ଗଞ୍ଜାମ ଜିଲ୍ଲାରେ ପୁଣି ଏକ ହୃଦୟବିଦାରକ ଏବଂ ଚାଞ୍ଚଲ୍ୟକର ଘଟଣା ସାମ୍ନାକୁ ଆସିଛି। କବିସୂର୍ଯ୍ୟନଗର ଥାନା ଅନ୍ତର୍ଗତ ଘାଟ ପାଇକ ସାହିରେ ଜଣେ ଏକାକୀ ରହୁଥିବା ବୃଦ୍ଧାଙ୍କୁ ନିର୍ମମ ଭାବେ ହତ୍ୟା କରାଯାଇଥିବା ବେଳେ, ଘରୁ ସୁନା ଅଳଙ୍କାର ଲୁଟ୍ ହୋଇଥିବା ଅଭିଯୋଗ ହୋଇଛି। ମୃତକ ହେଲେ ସ୍ଥାନୀୟ ଅଞ୍ଚଳର ପ୍ରତିମା ଜେନା। ସୂଚନା ଅନୁଯାୟୀ, ଗତ ରାତିରେ ସେ ସମ୍ପର୍କୀୟଙ୍କ ସହ କଥା ହୋଇ ଶୋଇବାକୁ ଯାଇଥିଲେ। ତେବେ ପରଦିନ ସକାଳେ ପରିବାର ଲୋକେ ତାଙ୍କୁ ଘର ଭିତରେ ଖଟ ତଳେ ମୃତ ଅବସ୍ଥାରେ ପାଇଥିଲେ। ଘରର କବାଟ ଖୋଲା ଥିବା ସହ ଆଲମାରୀ ଅସ୍ତବ୍ୟସ୍ତ ଅବସ୍ଥାରେ ଥିବାରୁ ଏବଂ ବୃଦ୍ଧାଙ୍କ ପିନ୍ଧିଥିବା ସୁନା ହାର, କାନଫୁଲ ସମେତ ଅନ୍ୟାନ୍ୟ ଅଳଙ୍କାର ଗାଏବ ଥିବାରୁ, ଏହା ଏକ ପୂର୍ବ ଯୋଜନାବଦ୍ଧ ଲୁଟ୍ ଓ ହତ୍ୟାକାଣ୍ଡ ବୋଲି ପ୍ରାଥମିକ ସନ୍ଦେହ କରାଯାଉଛି।

ଘଟଣାର ଖବର ପାଇ କବିସୂର୍ଯ୍ୟନଗର ପୋଲିସ ଓ ବୈଜ୍ଞାନିକ ତଦନ୍ତକାରୀ ଦଳ ଘଟଣାସ୍ଥଳରେ ପହଞ୍ଚି ପ୍ରମାଣ ସଂଗ୍ରହ କରିବା ସହ ତଦନ୍ତ ଆରମ୍ଭ କରିଛନ୍ତି। ଏହି ଘଟଣା ଗଞ୍ଜାମ ଜିଲ୍ଲାରେ ବଢ଼ୁଥିବା ଅପରାଧିକ କାର୍ଯ୍ୟକଳାପ ଏବଂ ଏକାକୀ ରହୁଥିବା ବୃଦ୍ଧବୃଦ୍ଧାଙ୍କ ସୁରକ୍ଷାକୁ ନେଇ ପୁଣିଥରେ ପ୍ରଶ୍ନ ଉଠାଇଛି। ଲୁଟ୍, ହତ୍ୟା ଓ ସଙ୍ଗଠିତ ଅପରାଧର ବୃଦ୍ଧି ସାଧାରଣ ଲୋକଙ୍କ ମନରେ ଭୟ ସୃଷ୍ଟି କରିଥିବା ବେଳେ, ଅପରାଧ ନିୟନ୍ତ୍ରଣ ପାଇଁ ପୋଲିସ ପକ୍ଷରୁ ଅଧିକ କଡ଼ା ପେଟ୍ରୋଲିଂ, ନଜରଦାରି ଏବଂ ଦ୍ରୁତ କାର୍ଯ୍ୟାନୁଷ୍ଠାନର ଦାବି ଜୋର ଧରିଛି। ବର୍ତ୍ତମାନ ଏହି ଘଟଣାରେ ସମ୍ପୃକ୍ତ ଅପରାଧୀଙ୍କୁ ଚିହ୍ନଟ କରି ଗିରଫ କରିବା ପୋଲିସ ପାଇଁ ବଡ଼ ଚ୍ୟାଲେଞ୍ଜ ହୋଇପଡ଼ିଛି।