ତାରାତାରିଣୀ ମନ୍ଦିର ନିକଟରେ ରୋପୱେ କର୍ମଚାରୀଙ୍କ ରହସ୍ୟଜନକ ମୃତ୍ୟୁ, ତଦନ୍ତରେ ପୋଲିସ

ଗଞ୍ଜାମ: ଗଞ୍ଜାମ ଜିଲ୍ଲା ପୁରୁଷୋତ୍ତମପୁର ଥାନା ଅନ୍ତର୍ଗତ ମା’ ତାରାତାରିଣୀ ମନ୍ଦିର ନିକଟରେ ଥିବା ଲକ୍ଷ୍ମୀପ୍ରିୟା ହୋଟେଲ ସମ୍ମୁଖରୁ ଜଣେ ଯୁବକଙ୍କ ମୃତଦେହ ଉଦ୍ଧାର ହେବା ପରେ ଅଞ୍ଚଳରେ ଚାଞ୍ଚଲ୍ୟ ସୃଷ୍ଟି ହୋଇଛି। ମୃତ ଯୁବକ ଜଣକ ପୁରୀ ଜିଲ୍ଲାର ମନୋଜ ସ୍ୱାଇଁ ବୋଲି ଜଣାପଡ଼ିଛି। ସେ ମା’ ତାରାତାରିଣୀ ମନ୍ଦିରର ରୋପୱେ ମରାମତି କାମ ପାଇଁ ଅନ୍ୟ ଦୁଇଜଣ ସହକର୍ମୀଙ୍କ ସହ ପୁରୀରୁ ଗଞ୍ଜାମ ଆସିଥିଲେ।

ସୂଚନା ଅନୁସାରେ, ଗତ ୨୮ ତାରିଖରୁ ମନୋଜ ଓ ତାଙ୍କ ସହଯୋଗୀମାନେ ଲକ୍ଷ୍ମୀପ୍ରିୟା ହୋଟେଲରେ ରହୁଥିଲେ। ତେବେ ଆଜି ସକାଳେ ହୋଟେଲ ନିକଟରେ ମନୋଜଙ୍କ ମୃତଦେହ ପଡ଼ିଥିବା ଦେଖି ସ୍ଥାନୀୟ ଲୋକେ ପୋଲିସକୁ ସୂଚନା ଦେଇଥିଲେ। ଖବର ପାଇ ପୁରୁଷୋତ୍ତମପୁର ପୋଲିସ ଘଟଣାସ୍ଥଳରେ ପହଞ୍ଚି ମୃତଦେହକୁ ଜବତ କରିବା ସହ ଘଟଣାର ତଦନ୍ତ ଆରମ୍ଭ କରିଛି।

ପ୍ରାଥମିକ ତଦନ୍ତରେ ମୃତ୍ୟୁର ସଠିକ୍ କାରଣ ସ୍ପଷ୍ଟ ହୋଇନାହିଁ। ପୋଲିସ ଏହା ଦୁର୍ଘଟଣା, ଅସ୍ୱାଭାବିକ ମୃତ୍ୟୁ କିମ୍ବା ଅନ୍ୟ କୌଣସି କାରଣରୁ ଘଟିଛି କି ନାହିଁ, ସେନେଇ ସମସ୍ତ ଦିଗରୁ ତଦନ୍ତ କରୁଛି। ମୃତଦେହକୁ ବ୍ୟବଚ୍ଛେଦ ପାଇଁ ପଠାଯାଇଥିବା ବେଳେ, ପୋଷ୍ଟମର୍ଟମ୍ ରିପୋର୍ଟ ପରେ ମୃତ୍ୟୁର ପ୍ରକୃତ କାରଣ ସାମ୍ନାକୁ ଆସିବ ବୋଲି ପୋଲିସ ସୂଚନା ଦେଇଛି। ଘଟଣାକୁ ନେଇ ସ୍ଥାନୀୟ ଅଞ୍ଚଳରେ ବିଭିନ୍ନ ଚର୍ଚ୍ଚା ଜାରି ରହିଥିବା ବେଳେ, ପୋଲିସ ତଦନ୍ତ ଶେଷ ହେବା ପରେ ଘଟଣାର ସମ୍ପୂର୍ଣ୍ଣ ସତ୍ୟାସତ୍ୟ ସ୍ପଷ୍ଟ ହେବ।