ପଶ୍ଚିମ ଏସିଆରେ ଚାଲିଥିବା ଭୂ-ରାଜନୈତିକ ଉତ୍ତେଜନା ଓ ଯୁଦ୍ଧ ପରିସ୍ଥିତି କାରଣରୁ କିଛି ସପ୍ତାହ ପୂର୍ବରୁ ଆନ୍ତର୍ଜାତିକ ବଜାରରେ ଅଶୋଧିତ ତୈଳ (Crude Oil) ଦର ପ୍ରତି ବ୍ୟାରେଲ ୧୧୨ ଡଲାର ପର୍ଯ୍ୟନ୍ତ ପହଞ୍ଚିଥିଲା। ଏହାର ପ୍ରଭାବରେ ବିଶ୍ୱର ଅନେକ ଦେଶରେ ପେଟ୍ରୋଲ ଓ ଡିଜେଲ ଦର ବୃଦ୍ଧି ପାଇଥିଲା। ତେବେ ପରିସ୍ଥିତିରେ ସୁଧାର ଆସିବା ସହ ବର୍ତ୍ତମାନ ଅଶୋଧିତ ତୈଳ ମୂଲ୍ୟ ପ୍ରତି ବ୍ୟାରେଲ ପ୍ରାୟ ୭୨ରୁ ୭୫ ଡଲାର ମଧ୍ୟରେ କାରବାର କରୁଛି। ଏହା ସତ୍ତ୍ୱେ ଭାରତର ଘରୋଇ ବଜାରରେ ପେଟ୍ରୋଲ ଓ ଡିଜେଲ ଦରରେ ସେହି ଅନୁପାତରେ ହ୍ରାସ ଦେଖିବାକୁ ମିଳୁନାହିଁ।

ରବିବାର ମଧ୍ୟ ଦେଶର ପ୍ରମୁଖ ସହରଗୁଡ଼ିକରେ ପେଟ୍ରୋଲ ଓ ଡିଜେଲ ଦର ଅପରିବର୍ତ୍ତିତ ରହିଛି। ଆନ୍ତର୍ଜାତିକ ବଜାରରେ ଅଶୋଧିତ ତୈଳ ଦର କମିଥିଲେ ମଧ୍ୟ ଦେଶୀୟ ଇନ୍ଧନ ମୂଲ୍ୟରେ ସେହି ପ୍ରଭାବ ନ ପଡ଼ିବାରୁ ସାଧାରଣ ଖାଉଟିଙ୍କ ମଧ୍ୟରେ ଅସନ୍ତୋଷ ବଢ଼ୁଛି। ବିଶେଷଜ୍ଞଙ୍କ ମତରେ, ଅନ୍ତର୍ଜାତିକ ବଜାର ଦର ସହ ଟଙ୍କାର ବିନିମୟ ମୂଲ୍ୟ, କେନ୍ଦ୍ର ଓ ରାଜ୍ୟ ସରକାରଙ୍କ କର ବ୍ୟବସ୍ଥା, ପରିବହନ ଖର୍ଚ୍ଚ ଓ ତୈଳ ବିପଣନ କମ୍ପାନୀମାନଙ୍କର ମୂଲ୍ୟ ନିର୍ଦ୍ଧାରଣ ନୀତି ମଧ୍ୟ ଇନ୍ଧନ ଦର ଉପରେ ପ୍ରଭାବ ପକାଇଥାଏ। ଫଳରେ ଆନ୍ତର୍ଜାତିକ ସ୍ତରରେ ଅଶୋଧିତ ତୈଳ ଦର କମିଥିଲେ ମଧ୍ୟ ଦେଶବାସୀ ତୁରନ୍ତ ଏହାର ଲାଭ ପାଇପାରୁ ନାହାନ୍ତି। ବର୍ତ୍ତମାନ ଉପଭୋକ୍ତାମାନେ ଆଶା କରୁଛନ୍ତି ଯେ, ଆଗାମୀ ଦିନରେ ବିଶ୍ୱ ବଜାରରେ ତୈଳ ଦର ସ୍ଥିର ରହିଲେ ଘରୋଇ ବଜାରରେ ମଧ୍ୟ ପେଟ୍ରୋଲ ଓ ଡିଜେଲ ମୂଲ୍ୟରେ ରିହାତି ମିଳିପାରେ।