ସୀମାନ୍ତ ରାଜ୍ୟ ପଞ୍ଜାବରେ ଘଟିଥିବା ଦୁଇ ଦୁଇଟି ବୋମା ବିସ୍ଫୋରଣ ଘଟଣା ଏବେ ସାରା ଦେଶରେ ଚାଞ୍ଚଲ୍ୟ ସୃଷ୍ଟି କରିବା ସହ ରାଜ୍ୟ ରାଜନୀତିକୁ ସମ୍ପୂର୍ଣ୍ଣ ଉଷ୍ମ କରିଦେଇଛି। ବୁଧବାର ଶ୍ରୀ ଆନନ୍ଦପୁର ସାହିବରେ ଶୁକ୍ରଣା ଯାତ୍ରା ଅବସରରେ ଗଣମାଧ୍ୟମକୁ ପ୍ରତିକ୍ରିୟା ଦେଇ ମୁଖ୍ୟମନ୍ତ୍ରୀ ଭଗବନ୍ତ ମାନ ଏହି ଘଟଣା ପାଇଁ ସିଧାସଳଖ ଭାରତୀୟ ଜନତା ପାର୍ଟିକୁ ଦାୟୀ କରି ଏକ ବଡ଼ ଅଭିଯୋଗ ଆଣିଛନ୍ତି। ମୁଖ୍ୟମନ୍ତ୍ରୀ କହିଛନ୍ତି ଯେ, ଏହି ବିସ୍ଫୋରଣଗୁଡ଼ିକ ଆଗାମୀ ନିର୍ବାଚନ ପାଇଁ ବିଜେପିର ଏକ ରଣନୀତି।
ନିର୍ବାଚନ ପୂର୍ବରୁ ସମାଜରେ ହିଂସା ଓ ଭୟର ବାତାବରଣ ସୃଷ୍ଟି କରି ରାଜନୈତିକ ଲାଭ ଉଠାଇବା ବିଜେପିର ପାରମ୍ପରିକ ପଦ୍ଧତି ବୋଲି ସେ କହିଛନ୍ତି। ପଶ୍ଚିମବଙ୍ଗ ନିର୍ବାଚନ ପରେ ବିଜେପି ନେତାମାନେ ଏବେ ପଞ୍ଜାବର ପାଳି ବୋଲି କହିଥିବା କଥା ମନେପକାଇବା ସହ ପଞ୍ଜାବ ଏକ ଶାନ୍ତିପ୍ରିୟ ରାଜ୍ୟ ଏବଂ ଏଠାକାର ଜନସାଧାରଣ ଏଭଳି ଛୋଟ ବିସ୍ଫୋରଣକୁ ଆଦୌ ଭୟ କରନ୍ତି ନାହିଁ ବୋଲି ସେ ଦୃଢ଼ତାର ସହ ପ୍ରକାଶ କରିଛନ୍ତି।
ଅପରପକ୍ଷରେ, ଏହି ସୁରକ୍ଷା ବିପର୍ଯ୍ୟୟକୁ ନେଇ ବିରୋଧୀ ଦଳଗୁଡ଼ିକ ଶାସକ ଆମ୍ ଆଦମୀ ପାର୍ଟି ସରକାରଙ୍କୁ ତୀବ୍ର ସମାଲୋଚନା କରିଛନ୍ତି। ଶିରୋମଣି ଅକାଳୀ ଦଳର ବରିଷ୍ଠ ନେତା ବିକ୍ରମ ସିଂହ ମାଜିଥିଆ ମୁଖ୍ୟମନ୍ତ୍ରୀ ମାନଙ୍କୁ ବ୍ୟକ୍ତିଗତ ଭାବେ ଆକ୍ଷେପ କରି କହିଛନ୍ତି ଯେ, ଏହି ବିସ୍ଫୋରଣ ରାଜ୍ୟ ସରକାରଙ୍କ ପାଇଁ ଏକ ସତର୍କ ଘଣ୍ଟି।
ପାକିସ୍ତାନ ସହ ୫୫୦ କିଲୋମିଟର ଲମ୍ବା ସୀମା ଥିବା ଏକ ସମ୍ବେଦନଶୀଳ ରାଜ୍ୟର ମୁଖ୍ୟମନ୍ତ୍ରୀ ଯଦି ସଦାସର୍ବଦା ମଦ୍ୟପାନ କରି ନିଶାଗ୍ରସ୍ତ ଅବସ୍ଥାରେ ରୁହନ୍ତି, ତେବେ ରାଜ୍ୟର ଆଇନ ଶୃଙ୍ଖଳା କିଭଳି ନିୟନ୍ତ୍ରିତ ହେବ ବୋଲି ସେ ପ୍ରଶ୍ନ କରିଛନ୍ତି। ସେହିପରି କଂଗ୍ରେସ ନେତା ଅଭିଷେକ ଦତ୍ତ ମଧ୍ୟ ପଞ୍ଜାବର ସୁରକ୍ଷା ସ୍ଥିତିକୁ ନେଇ ଚିନ୍ତା ପ୍ରକଟ କରିବା ସହ ରାଜ୍ୟ ସରକାର ଅହଂକାର ତ୍ୟାଗ କରି ଜାତୀୟ ସୁରକ୍ଷା ପ୍ରସଙ୍ଗରେ କେନ୍ଦ୍ର ସରକାରଙ୍କ ସହ ମିଶି କାର୍ଯ୍ୟ କରିବା ଉଚିତ ବୋଲି ପରାମର୍ଶ ଦେଇଛନ୍ତି।
