ଅନୁଗୋଳ ଜିଲ୍ଲାର ଦୁଇ ଦିନିଆ ଗସ୍ତରେ ଥିବା ଉପମୁଖ୍ୟମନ୍ତ୍ରୀ ପ୍ରଭାତୀ ପରିଡାଙ୍କୁ ଶନିବାର ସ୍ଥାନୀୟ ମହିଳାଙ୍କ ବିରୋଧର ସମ୍ମୁଖୀନ ହେବାକୁ ପଡ଼ିଛି। କୋଶଳା ଗ୍ରାମର ଅଧିଷ୍ଠାତ୍ରୀ ମା’ ରାମଚଣ୍ଡୀଙ୍କ ଦର୍ଶନ ସାରି ଫେରୁଥିବା ସମୟରେ କିଛି ମହିଳା ତାଙ୍କୁ ଘେରାଉ କରି ନିଜ ଦାବି ଉପସ୍ଥାପନ କରିଥିଲେ।

ମହିଳାମାନଙ୍କ ଅଭିଯୋଗ ଅନୁସାରେ, ଗ୍ରାମରେ କୋଇଲା ପରିବହନକୁ ବିରୋଧ କରି ଆନ୍ଦୋଳନ କରିବା ପରେ ପୋଲିସ ୫ ଜଣ ସ୍ଥାନୀୟ ଯୁବକଙ୍କୁ ମିଥ୍ୟା ମାମଲାରେ ଗିରଫ କରିଥିଲା। ସେମାନଙ୍କ କହିବା ଅନୁଯାୟୀ, ପ୍ରଶାସନର ଆଶ୍ୱାସନ ପରେ ଆନ୍ଦୋଳନ ପ୍ରତ୍ୟାହାର କରାଯାଇଥିଲେ ମଧ୍ୟ, ଘଟଣାର ୮୪ ଦିନ ବିତିଯାଇଥିଲେ ସୁଦ୍ଧା ଗିରଫ ଯୁବକମାନଙ୍କୁ ଜାମିନ ମିଳିନାହିଁ। ବରଂ ସେମାନଙ୍କ ବିରୋଧରେ କ୍ରମାଗତ ଭାବେ ନୂଆ ନୂଆ ମାମଲା ରୁଜୁ କରାଯାଉଥିବା ଅଭିଯୋଗ ମଧ୍ୟ ଉଠିଛି।

ଏହି ପ୍ରସଙ୍ଗରେ ଉପମୁଖ୍ୟମନ୍ତ୍ରୀଙ୍କ ନିକଟରୁ ସ୍ପଷ୍ଟ ଏବଂ ସନ୍ତୋଷଜନକ ଉତ୍ତର ନ ମିଳିବାରୁ ମହିଳାମାନେ କିଛି ସମୟ ପର୍ଯ୍ୟନ୍ତ ତାଙ୍କୁ ଘେରାଉ କରି ପ୍ରତିବାଦ ଜାରି ରଖିଥିଲେ। ପରିସ୍ଥିତି ଉତ୍ତେଜନାପୂର୍ଣ୍ଣ ହେବାରୁ ପୁଲିସ ହସ୍ତକ୍ଷେପ କରି ଉପମୁଖ୍ୟମନ୍ତ୍ରୀଙ୍କୁ ସୁରକ୍ଷା ବଳୟ ମଧ୍ୟରେ ସେଠାରୁ ବାହାର କରି ନେଇଥିଲା।

ସ୍ଥାନୀୟ ଲୋକଙ୍କ ଦାବି, ଗିରଫ ଯୁବକମାନଙ୍କୁ ଶୀଘ୍ର ନ୍ୟାୟ ମିଳୁ ଏବଂ ମିଥ୍ୟା ମାମଲା ପ୍ରତ୍ୟାହାର କରାଯାଉ। ଏହି ଘଟଣା ପରେ କୋଇଲା ପରିବହନକୁ କେନ୍ଦ୍ର କରି ଅଞ୍ଚଳରେ ପୁଣିଥରେ ଅସନ୍ତୋଷର ପରିବେଶ ସୃଷ୍ଟି ହୋଇଥିବା ବେଳେ, ପ୍ରଶାସନର ପରବର୍ତ୍ତୀ ପଦକ୍ଷେପ ଉପରେ ସମସ୍ତଙ୍କ ନଜର ରହିଛି।