ଆଜିଠୁ ରତ୍ନଭଣ୍ଡାରରେ ଚାଲୁ ଥିବା ଗଣନା କାର୍ଯ୍ୟକୁ ସ୍ଥଗିତ କରାଯାଇଛି। ପ୍ରଶାସନିକ କାରଣରୁ ଏହି ନିଷ୍ପତ୍ତି ନିଆଯାଇଥିବା ବେଳେ, ଭିତରକାଠ ଦର୍ଶନ କାର୍ଯ୍ୟ ସାଧାରଣ ଭାବେ ଚାଲିବ ବୋଲି ସୂଚନା ମିଳିଛି। ଶ୍ରଦ୍ଧାଳୁମାନେ ପୂର୍ବବତ ଭାବରେ ଭିତରକାଠ ଦର୍ଶନ କରିପାରିବେ ଏବଂ ଏହାରେ କୌଣସି ବାଧା ସୃଷ୍ଟି ହେବ ନାହିଁ।

ଅଧିକାରୀମାନେ ଜଣାଇଛନ୍ତି ଯେ ରତ୍ନଭଣ୍ଡାର ସମ୍ବନ୍ଧୀୟ କାର୍ଯ୍ୟଗୁଡ଼ିକୁ ସମ୍ପୂର୍ଣ୍ଣ ସୁରକ୍ଷା ଓ ନିୟମିତ ପ୍ରକ୍ରିୟା ଅନୁସାରେ ପୁନର୍ବାର ଆରମ୍ଭ କରାଯିବ। ଏହି ମଧ୍ୟବେଳେ ମନ୍ଦିର ପରିସରରେ ଭକ୍ତମାନଙ୍କ ଆଗମନ ସାଧାରଣ ଭାବରେ ଚାଲିଛି ଏବଂ ପ୍ରଶାସନ ଶାନ୍ତିଶୃଙ୍ଖଳା ବଜାୟ ରଖିବା ପାଇଁ ସମସ୍ତ ପଦକ୍ଷେପ ନେଇଛି।। ଏହାସହ ଆଜିଠାରୁ ଭକ୍ତମାନଙ୍କ ପାଇଁ ଭିତରକାଠ ଦର୍ଶନ ସାଧାରଣ ଭାବରେ ଚାଲୁ ରହିବ ବୋଲି ପ୍ରଶାସନ ସୂଚନା ଦେଇଛି। ଗତକାଲି ରତ୍ନ ଗଣତିର ଚତୁର୍ଦ୍ଦଶ ଦିନ ଥିଲା ଏବଂ ଭିତର ଭଣ୍ଡାର ଗଣନାର ନବମ ଦିନରେ ପ୍ରାୟ ୩ ଘଣ୍ଟା ୫୮ ମିନିଟ ଧରି କାର୍ଯ୍ୟ ଚାଲିଥିଲା। ଏହି ସମୟରେ ପ୍ରତ୍ୟେକ ଅଳଙ୍କାରର ଓଜନ ନିର୍ଣ୍ଣୟ ସହ ତାହାରେ ଖଚିତ ମୂଲ୍ୟବାନ ରତ୍ନଗୁଡ଼ିକ ଚିହ୍ନଟ କରାଯାଇଛି। ଫଟୋଗ୍ରାଫି, ଭିଡିଓ ଗ୍ରାଫି, ଥ୍ରି-ଡି ମ୍ୟାପିଂ ଏବଂ ଇ-କ୍ୟାଟାଲଗ୍ ମାଧ୍ୟମରେ ସମସ୍ତ ତଥ୍ୟ ଡକ୍ୟୁମେଣ୍ଟ କରାଯାଉଛି। ଯଦିଓ ସମ୍ପୂର୍ଣ୍ଣ ଅଳଙ୍କାର ଗଣନାର ସଠିକ ତଥ୍ୟ ଏପର୍ଯ୍ୟନ୍ତ ଆଧିକାରିକ ଭାବେ ଘୋଷଣା ହୋଇନାହିଁ, ତଥାପି ପ୍ରାୟ ୧୭୦ଟି ଅଳଙ୍କାରର ଗଣତି ସମ୍ପୂର୍ଣ୍ଣ ହୋଇଥିବା ଆକଳନ କରାଯାଉଛି। ଏହି ସମୟରେ ସୁରକ୍ଷା ଓ ପାରଦର୍ଶିତାକୁ ମୁଖ୍ୟ ଧ୍ୟାନରେ ରଖି ଆଗାମୀ କାର୍ଯ୍ୟ ପୁନର୍ବାର ଆରମ୍ଭ କରାଯିବ ବୋଲି ମଧ୍ୟ ପ୍ରଶାସନ ଜଣାଇଛି।