ତାମିଲନାଡୁ ବିଧାନସଭା ନିର୍ବାଚନର ଫଳାଫଳରେ ରାଜ୍ୟର ସବୁଠାରୁ ବଡ଼ ଦଳ ଭାବରେ ଟିଭିକେ ଉଭା ହୋଇଛି। ଏହା ପରେ, ତାମିଲନାଡୁ ଭେଟ୍ରି କାଝାଗମ (ଟିଭିକେ) ମଙ୍ଗଳବାର ଏକ ବୈଠକ କରିଥିଲା। ପାର୍ଟି ସୁପ୍ରିମୋ ବିଜୟଙ୍କୁ ସର୍ବସମ୍ମତିକ୍ରମେ ବିଧାୟକ ଦଳର ନେତା ଭାବରେ ନିର୍ବାଚିତ କରାଯାଇଥିଲା।
ଦଳ ସରକାର ଗଠନ ପାଇଁ ଆବଶ୍ୟକ ବିଧାୟକଙ୍କ ମ୍ୟାଜିକ୍ ସଂଖ୍ୟା ଏବଂ ସମର୍ଥନ ସମ୍ପର୍କରେ ମଧ୍ୟ ନିଜର ମତ ସ୍ପଷ୍ଟ କରିଛି। ସୂତ୍ର ଅନୁଯାୟୀ, ସରକାର ଗଠନ ପାଇଁ ବିଧାୟକଙ୍କ ସମର୍ଥନ ଅଭାବ ପରିପ୍ରେକ୍ଷୀରେ, ବୈଠକରେ କୁହାଯାଇଥିଲା ଯେ ଆତ୍ମସମ୍ମାନ ସହିତ କୌଣସି ସାଲିସ୍ କରାଯିବ ନାହିଁ। ଏହାର ଅର୍ଥ ହେଉଛି ବିଧାୟକଙ୍କ ସମର୍ଥନ ପାଇଁ ଦଳ କୌଣସି ଦଳ ପାଖରେ ହାତ ପତାଇବ ନାହିଁ। ଏହି ସମ୍ପୂର୍ଣ୍ଣ ପ୍ରକ୍ରିୟା ଅର୍ଗାନିକ୍ ହେବ। ଏହାର ଅର୍ଥ ହେଉଛି ଯେ, ଯିଏ ଟିଭିକେ ସହିତ କଥା ହେବାକୁ ଆସିବେ ତାଙ୍କ ସହିତ କଥାବାର୍ତ୍ତା କରାଯିବ। ସୂତ୍ରଗୁଡ଼ିକ ଏହା ମଧ୍ୟ କହିଛନ୍ତି ଯେ, ଟିଭିକେକୁ ସମର୍ଥନ କରୁଥିବା ଦଳଗୁଡ଼ିକୁ କ୍ଷମତା ଦେବାରେ ଦଳର କୌଣସି ଆପତ୍ତି ରହିବ ନାହିଁ। ଦଳର ବରିଷ୍ଠ ନେତାମାନେ ମେଣ୍ଟ ବିଷୟରେ ଆଲୋଚନା କରିବେ। ତାମିଲନାଡୁର ୨୩୪ ବିଧାନସଭା ଆସନ ମଧ୍ୟରୁ ଟିଭିକେ ୧୦୮ଟିରେ ବିଜୟୀ ହୋଇଛି, ବହୁମତ ପାଇଁ ୧୦ଟି ଆସନ ପଛରେ ରହିଛି। ବିଜୟ ରାଜ୍ୟପାଳଙ୍କୁ ଚିଠି ଲେଖି ସରକାର ଗଠନ ପାଇଁ ଦାବି କରିଛନ୍ତି। ଦଳ ପକ୍ଷରୁ ରାଜ୍ୟପାଳଙ୍କୁ ପଠାଯାଇଥିବା ଏକ ଇମେଲ୍ ମାଧ୍ୟମରେ ବିଜୟ କହିଛନ୍ତି ଯେ, ଟିଭିକେ ସବୁଠାରୁ ବଡ଼ ଦଳ ହୋଇଥିବାରୁ ଏହାକୁ ସରକାର ଗଠନ ପାଇଁ ନିମନ୍ତ୍ରଣ କରାଯିବା ଉଚିତ। ଦଳକୁ ବିଧାନସଭାରେ ବହୁମତ ପ୍ରମାଣ କରିବା ପାଇଁ ସୁଯୋଗ ଦେବାକୁ ମଧ୍ୟ ଅନୁରୋଧ କରାଯାଇଛି। ଟିଭିକେ ସୂତ୍ର ଅନୁଯାୟୀ, ଦଳ ଗୃହରେ ବହୁମତ ପ୍ରମାଣ କରିବା ପାଇଁ ଦୁଇ ସପ୍ତାହ ସମୟ ଲୋଡ଼ିଛି। ଜଣେ ଅଧିକାରୀ କହିଛନ୍ତି ଯେ, ଯଦି କୌଣସି ଦଳ ସ୍ପଷ୍ଟ ବହୁମତ ହାସଲ ନକରନ୍ତି, ତେବେ ରାଜ୍ୟପାଳ ଆଇନ ବିଶେଷଜ୍ଞଙ୍କ ସହିତ ପରାମର୍ଶ କରିବା ପରେ ପରବର୍ତ୍ତୀ କାର୍ୟ୍ୟାନୁଷ୍ଠାନ ଗ୍ରହଣ କରିବେ। ବିଜୟଙ୍କ ପନାୟୁର ବାସଭବନ ବାହାରେ ବ୍ୟାପକ ପୁଲିସ ମୁତୟନ କରାଯାଇଛି। ସେ ଦୁଇଟି ଆସନ ପେରାମ୍ବୁର ଏବଂ ତିରୁଚିରାପାଲି ପୂର୍ବ – ଜିତିଛନ୍ତି। ସେ ପେରାମ୍ବୁର ଆସନ ରଖିବାର ସମ୍ଭାବନା ଅଛି।
