ପ୍ରତିରକ୍ଷା ମନ୍ତ୍ରୀ ରାଜନାଥ ସିଂହ ପାକିସ୍ତାନକୁ ଏକ ସ୍ପଷ୍ଟ ଏବଂ କଡ଼ା ବାର୍ତ୍ତା ଦେଇଛନ୍ତି ଯେ ଭାରତ କୌଣସି ଆତଙ୍କବାଦୀ କାର୍ୟ୍ୟକଳାପକୁ ସହ୍ୟ କରିବ ନାହିଁ। ସେ କହିଛନ୍ତି, ଅପରେସନ ସିନ୍ଦୂରକୁ ବର୍ଷେ ପୂରଣ ହୋଇଛି ଏବଂ ନୂତନ ବିଶ୍ୱ କ୍ରମରେ ଏହା ଭାରତର ପରିବର୍ତ୍ତିତ ନୀତିର ପ୍ରତୀକ ଭାବରେ ଉଭା ହୋଇଛି। ଭାରତ ଆଉ ଏପରି ଏକ ଦେଶ ନୁହେଁ ଯେ, ଆତଙ୍କବାଦୀ ଆକ୍ରମଣ ପରେ କେବଳ କୂଟନୈତିକ ବିବୃତି ଜାରି କରିବ। ଅପରେସନ୍ ସିନ୍ଦୂର ବିଶ୍ୱକୁ ଏକ ସ୍ପଷ୍ଟ ସଙ୍କେତ ଦେଇଛି ଯେ, ଭାରତ ଏହାର ସୁରକ୍ଷା ପ୍ରସଙ୍ଗରେ ନିର୍ଣ୍ଣାୟକ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ପଛଘୁଞ୍ଚା ଦେବ ନାହିଁ। ପ୍ରତିରକ୍ଷା ମନ୍ତ୍ରୀ ରାଜନାଥ ସିଂହ ପାକିସ୍ତାନକୁ ଟାର୍ଗେଟ କରି କହିଛନ୍ତି ଯେ ଆଜି ଯେତେବେଳେ ଭାରତ ବିକାଶର ନୂତନ ମାନଦଣ୍ଡ ସ୍ଥାପନ କରୁଛି ଏବଂ ସାରା ବିଶ୍ୱରେ ସୂଚନା ପ୍ରଯୁକ୍ତିବିଦ୍ୟା (ଆଇଟି) କ୍ଷେତ୍ରରେ ଏକ ବିଶ୍ୱସ୍ତରୀୟ ପରିଚୟ ସୃଷ୍ଟି କରିଛି, ପାକିସ୍ତାନ ‘ଦ୍ୱିତୀୟ ଆଇଟି’ ଅର୍ଥାତ୍ ଅନ୍ତର୍ଜାତୀୟ ଆତଙ୍କବାଦର କେନ୍ଦ୍ର ପାଲଟିଛି।
ରାଜନାଥ ସିଂହ କହିଛନ୍ତି, ଅପରରେସନ ସିନ୍ଦୂର ଅପରେସନ୍ ସମୟରେ କେବଳ ଭାରତ ଉପରେ ଆକ୍ରମଣ କରିଥିବା ଶିବିରଗୁଡ଼ିକୁ ଟାର୍ଗେଟ କରାଯାଇଥିଲା, ଯେତେବେଳେ ପାକିସ୍ତାନ ଭାରତରେ ସାଧାରଣ ନାଗରିକ ଅଞ୍ଚଳ ଉପରେ ଆକ୍ରମଣ କରିବାର ଘୃଣ୍ୟ କାର୍ୟ୍ୟ କରିଥିଲା। ସେ ଏହା ମଧ୍ୟ ସ୍ପଷ୍ଟ କରିଛନ୍ତି ଯେ, ଅପରେସନ ବନ୍ଦ କରିବା ଭାରତର ରଣନୈତିକ ପସନ୍ଦ ଥିଲା, ଦୁର୍ବଳତାର ପରିଣାମ ନୁହେଁ। ଆବଶ୍ୟକ ହେଲେ ଭାରତ ଏକ ଦୀର୍ଘକାଳୀନ ସଂଘର୍ଷ ପାଇଁ ସମ୍ପୂର୍ଣ୍ଣ ପ୍ରସ୍ତୁତ ଥିଲା। ପ୍ରତିରକ୍ଷା ମନ୍ତ୍ରୀ କହିଛନ୍ତି, ମୁଁ ଏଠାରେ ପୁଣି ଥରେ ସ୍ପଷ୍ଟ କରିବାକୁ ଚାହୁଁଛି ଯେ, ଆମର କ୍ଷମତା କମ୍ ହୋଇଯାଇଥିବାରୁ ଆମେ ସେହି ଅପରେସନକୁ ବନ୍ଦ କରିନାହୁଁ। ଆମେ ଏହାକୁ ସ୍ୱେଚ୍ଛାକୃତ ଭାବରେ, ନିଜସ୍ୱ ସର୍ତ୍ତରେ ବନ୍ଦ କରିଥିଲୁ। ଆବଶ୍ୟକ ହେଲେ, ଆମେ ଏକ ଦୀର୍ଘ ସଂଘର୍ଷ ପାଇଁ ସମ୍ପୂର୍ଣ୍ଣ ପ୍ରସ୍ତୁତ ଥିଲୁ। ଆମର ଉତ୍କ୍ଷେପଣ କ୍ଷମତା, ହଠାତ୍ ଆବଶ୍ୟକତା ସମୟରେ ଆମର କ୍ଷମତାକୁ ବିସ୍ତାର କରିବାର କ୍ଷମତା, ପୂର୍ବରୁ ଥିଲା ଏବଂ ଏବେ ବି ଅଛି, ଏବଂ ପୂର୍ବ ଅପେକ୍ଷା ଆହୁରି ସୁଦୃଢ଼ ରହିଛି।
