ଗଞ୍ଜାମ ଜିଲ୍ଲା ଖଲ୍ଲିକୋଟ କୈରାସି ଛକରୁ ଭିକାପଡ଼ା, ଖୋଜାପଲ୍ଲୀ, ବାଦପାଲ୍ଲି ଓ ଆଇତିପୁରକୁ ସଂଯୋଗ କରୁଥିବା ମୁଖ୍ୟ ରାସ୍ତାଟି ଗତ ୪ ବର୍ଷ ଧରି ଅତ୍ୟନ୍ତ ଶୋଚନୀୟ ଅବସ୍ଥାରେ ପହଞ୍ଚିଛି। ଏହି ରାସ୍ତା ଦେଇ ପ୍ରତିଦିନ ୫ଟି ପଞ୍ଚାୟତର ହଜାର ହଜାର ଲୋକ ଯାତାୟାତ କରୁଥିବା ବେଳେ ବଡ଼ ବଡ଼ ଖାଲଖମା ଓ ଭଙ୍ଗା ଅବସ୍ଥା ଯୋଗୁଁ ଯାତ୍ରା ଅତ୍ୟନ୍ତ ବିପଦଜନକ ହୋଇପଡ଼ିଛି। ସ୍ଥାନୀୟ ଲୋକଙ୍କ କହିବା ଅନୁସାରେ, ୨୦୧୭ ମସିହାରେ ଗ୍ରାମ୍ୟ ଉନ୍ନୟନ ବିଭାଗ ପକ୍ଷରୁ ନିର୍ମିତ ଏହି ରାସ୍ତାଟି ପରେ ମେଗା ଜଳ ପ୍ରକଳ୍ପର ପାଇପ୍ ବିଛାଇବା ପାଇଁ ବାରମ୍ବାର ଖୋଳାଯାଇଥିଲା। କିନ୍ତୁ କାମ ସମାପ୍ତ ପରେ ସଠିକ୍ ମରାମତି ନହେବାରୁ ରାସ୍ତାର ଅବସ୍ଥା ଧୀରେ ଧୀରେ ଅଧିକ ଖରାପ ହୋଇଯାଇଛି। ଭାରୀ ଯାନବାହନ ଚଳାଚଳ ଏବଂ ବର୍ଷା ପାଣିର ପ୍ରଭାବରେ ରାସ୍ତାଟି ଅଧିକ ଭାଙ୍ଗିଯାଇ ଗଭୀର ଖାଲଖମାରେ ପରିଣତ ହୋଇଛି।
ଏହି ରାସ୍ତାର ଖରାପ ଅବସ୍ଥା ଯୋଗୁଁ ସାଧାରଣ ଲୋକଙ୍କ ଦୈନନ୍ଦିନ ଯାତାୟାତ ଅତ୍ୟନ୍ତ କଷ୍ଟସାଧ୍ୟ ହୋଇପଡ଼ିଛି। ସ୍କୁଲ ଛାତ୍ରଛାତ୍ରୀ, ରୋଗୀ ଓ ବୃଦ୍ଧବୃଦ୍ଧାମାନେ ସବୁଠୁ ଅଧିକ ସମସ୍ୟାରେ ପଡ଼ୁଛନ୍ତି। ଜରୁରୀ ସେବା ଯଥା ଆମ୍ବୁଲାନ୍ସ ଓ ଅଗ୍ନିଶମ ବାହିନୀ ଗାଡ଼ି ମଧ୍ୟ ଏହି ରାସ୍ତା ଦେଇ ଚଳାଚଳରେ ବାଧା ଅନୁଭବ କରୁଛି। ବାରମ୍ବାର ଅଭିଯୋଗ ସତ୍ୱେ କୌଣସି ସ୍ଥାୟୀ ସମାଧାନ ନ ହେବାରୁ ସ୍ଥାନୀୟ ଲୋକେ ଅସନ୍ତୋଷ ପ୍ରକାଶ କରୁଛନ୍ତି।
ବିଭାଗୀୟ ଅସ୍ପଷ୍ଟତା ଏବଂ ପରସ୍ପର ଦୋଷାରୋପଣ ଯୋଗୁଁରାସ୍ତା ମରାମତି କାମ ଅଟକି ରହିଛି। ଏହି ପରିସ୍ଥିତିରେ ଆଗାମୀ ବର୍ଷା ଋତୁରେ ସମସ୍ୟା ଆହୁରି ଗୁରୁତର ହେବାର ଆଶଙ୍କା ରହିଛି। ସ୍ଥାନୀୟ ଲୋକେ ତୁରନ୍ତ ରାସ୍ତା ମରାମତି ଓ ସ୍ଥାୟୀ ସମାଧାନ ପାଇଁ ପ୍ରଶାସନକୁ ଦାବି କରୁଛନ୍ତି।
